DOWNLOAD OUR APP

Read latest news on your phone
app-store

Editorial - Ruihhlo leh HIV ah tanlak a ngai

Aug 28, 2022

Ruihhlo do tur hian sawrkar, kohhran leh khawtlangin theihtawp kan chhuah a hun ta tak zet a, kan tanrual phawt chuan kan hneh thei a ni tih hriain kan zavaiin tan ila thar teh ang u

Tunhnaiah Mizoram Police leh Excise ten ruihhlo an man nasa hle mai a. Heng ruihhlo te hi a tlangpuiin khawchhak lam atanga lo kal te an ni a, tuna an man te hi chu ruihhlo lo lut atanga chhut chuan tlem te chauh an ni a. Man loh hi a tam fe zawk an ni ngei ang. Ruihhlo hian tunah chuan Mizoram khawtin deuh thaw a fan chhuak a, chhungkaw tam tak lungngaihna leh tahna thlentu a ni.

Ruihhlo in a ken tel thil pawi tak mai chu HIV/AIDS hi a ni. Mithiamte sawi danin Mizorama HIV inkaidarhna bul ber chu ruihhlo leh mipat hmeichhiatna hman dik loh vang a ni a. Ruihhlo ti thin te hian inchiuna hriau inhmantawmin midangah HIV hrik an thehdarh a, chutiang bawkin ruihhlo ti thin hmeichhiate hian sex hmangin an tidarh nasa hle niin an sawi.

Aizawl khawpui ah ringawt pawh hian nula/tleirawl ruihhlo ti thin an tam hle niin mithiamte chuan an sawi a. Heng tleirawl te hian an ruihhlo tih nan leh sum tuak nan an inzuar thin a, anmahni dawrtute zingah HIV hi an thehdarh a. Hei vang hian nu pawisawi lo tam takin an pasalte atangin hri an kai a. Mizoram mipui ah hian mass test chu nei phei ila ruihhlo vanga HIV kai hi rinphak baka tam an awm hial awm e.

Ruihhlo hian sualna chi hrang hrang a ken tel bawk avangin nu leh pa, khawtlang kan mangang in kan rum tak meuh a. Ruihhlo ngaite enkawlna hmun hrang hrangte chu a khat mai ni lovin an enkawl theih zat aia tam deuh vek an enkawl bawk a. Mizoram hi a mihring cheng zat atanga chhut phei chuan India ramah hian home ngah ber kan ni hial awm e. A zahthlakin tan lak a ngai tak meuh tih a lang chiang hle. 

Ruihhlo do tur hian kan zavaia tanrual a ngai tak zet ta a. Tun ang renga kan kal chuan nakin lawka kan thalaite hi hmantlak lohin an awm ngei dawn a, chu chu kan hnam hian a tuar ang a. Nakin lawkah kan hnam hi a ral mai ang tih a hlauhawm ta hle. Chuvangin tih tak zeta tanlak a ngai a. Ruihhlo do tur hian sawrkar, kohhran leh khawtlangin theihtawp kan chhuah a hun ta tak zet a, kan tanrual phawt chuan kan hneh thei a ni tih hriain kan zavaiin tan ila thar teh ang u.

Share now