Hachhek bialtu MLA Robert Romawia Royte chuan April ni 26,2024 khan Mizo Hnam Run-ah thu sawiin kum liamta 2023-24 chhunga Scheme for Special Assistance to States for Capital Investment (SASCI) a Mizoram sum dawn tur zinga mi vbc. 233.31 chu hman theih lohin a kir 'lapse' niin a sawi a. He thil hian inhnialna a chawkchhuak nghal.

MLA Robert Romawia Royte sawi dan chuan kum kalta 2023-24 atan SASCI hnuaiah hian vbc 700 sanction tawh a ni a, sum hi October ni 6,2023 ah 1st installment dawn a ni tawh a. Mahse ZPM sawrkar chuan sawrkar hmasa in dan ang thlapa contractor a thlan tawhte a thawhtir duh loh vangin a lapse ta niin a sawi a. Hemi chungchangah hian May 3, 2024 khan Chief Minister Lalduhoma chuan press mite kawmin vbc 233 ti lapse anga sawrkar puhna chu thil hriatchian loh vang a nih thu sawiin sum lapse anga sawi chu sawrkar hmasa atanga hna anlo inpek tawh 75% anla zawh loh avangin 2nd instalment an hmu thei lo a ni tiin, sawrkar hmasa, MNF sawrkarin in hna an thawh muan avangin a lapse ta niin a sawi.   

Hetih lai vek hian May ni 8,2024 khan MNF Legislature Party chuan Aizawl Press Club-ah chanchinbumite kawmin SASCI hnuaia hmasawnna ruhrel siamna tur sum cheng vbc 233 hman loha kir leh 'lapse' chu Mizoram state leh mipuite tana chânna nasa tak a ni tiin, a mawhphurtu Finance leh Chief Minister chu mipui hnena ngaihdam dil turin an ti a. Leader of Opposition Lalchhandama Ralte chuan ZPM sawrkar chu SASCI sum ti lapse tu an nih thu a sawi a, ZPM sawrkar chuan SASCI sum chu pe chhuak mai loin a suasam chu an la thutak hle tih sawiin, hemi chungchang hi Mizoram Larsap hnenah an thlen dawn bakah a tul angin sawrkar laipui lamah pawh bawhzui zel an tum tih a sawi a ni.

Kan ram roreltu tura kan thlan te thusawi hi a inkalh ta tlat mai a. Sawrkarna chang mektu leh sawrkar kalta te thusawi hi a inkalh tlat avangin mipuite chuan thu thusawi nge dik a, tunge thiama thiam lo tih hre lovin kan awm ta hrih a ni.

Tuna rorellai leh eptu te thu inchuh hi a theuneu lo hle mai a. Hmasawnna hnathawna tur sum heti zat mai hman theih loha a awm hi ngawihbopui mai chi a ni lo. SASCI sum te phei chu pung awm lova kum 50 hnua rulh tur a ni a, he sum hi lapse ta lo se Mizoram hmelhmang chawikang dawrh thei hmasawnna hnathawhna tham a ni a, a uiawm tak zet a ni. Chuvangin SASCI sum lapse chungchang hi chhuichian ngei nise, mipuiah thu dik tak puangin thu dik lo sawi zawk chuan Zoram mipuite hnenah thupha chawi ngei teh se.