Tun hnaia kan ram luite a lo fai theihna tura hmalakna lian tak Save the Riparians Project kal mek chuan Mizoram-ah rah tha a chhuah chho mek a, he hmalakna pawimawh tak hi mipui lam pawhin tha kan ti tlang hle a, amaherawh chu he hmalakna hi tha lo tih ve ngawta awmze nei a ni lo a, mipui te hian tih ve tur kan nei tih kan hriat erawh a pawimawh hle a, a tak taka hma kan lak theuh a ngai.

Save the Riparians te hma an lakna a zarah hian chanchin ngaihnawm tak tak hriat tur a awm chho zut a, Champhai tleirawl pali te hmalakna te leh Kolasib lama Tuichhuahen hnar tihfai thawm te pawh kan hre chho a, heng mai bakah hian Tui­rial fintu lui tihfai thawm te kan hre chho bawk a, heng mai bakah hian a ram pum huapa hriat lem lohin hmalakna khaw hrang hranga neih a ni chho bawk.

Heng hmalakna te hi a hlut viau rual hian mipui lam pawh hian tih tur kan ngah hle, kan kawngpui leh khawchhunga kan kawr te en hian hmabak kan la ngah hle tih a hriat. Khaw­chhunga kawr te leh kan kawngpui dung te a fai loh chuan khu ti laia lui te kan thenfai hian awmzia a nei thui dawn lo tih kan hriat a ngai a, heng kan kawr leh kawngpuia kan bawlhhlawh te hian kan lui dung bak hi kalna tur a nei chuang lo tih hi kan thinlungah a cham reng a ngai a, kan bawlh­hlawh te hi a paihna tura kan paih lo a nih chuan khu ti laia kan lui dung thenfai hian awmzia a nei thui dawn lo tih hi kan rilru-ah kan vawn reng a tul khawp mai, kan nitin nun dan leh chet dan en hi chuan kan lui dung te hi fai mai thei dinhmunah a ding lo hle tih a lang.

Furpui kan hmachhawn chho dawn a, ruah surin kan khawlai a bawlhhlawh te an lenkhawm leh ang a, kan kawr tui nut leh dan tur hi ngaihtuah ngam pawh a ni lo, Aizawl-a kan thli tam tak chu kan tui tlan ber Tlawng lui-ah an luang lut leh ang a, chu tui chu sawngbawl a nih hnua kan in leh tur a ni a, kan dinhmun hi kan ngaihtuah chian a ngai hle. Kan nitin bawlh­hlawh paih thli kha kan in tur a ni tih hi kan rilru-ah a awm reng a tul. Chuvangin kan bawlh­hlawh paih danah hian kan fimkhur a ngai a, kan lui dung te hi a hranpa a thenfai ngai lovin kan nitin nun dan avanga a lo fai theihna turin tan lak a ngai. Khawchhunga kan kawrah te hian Ulawng te Uchang te hi hmuh tur awm leh ngat sela chuan kan lui dung hi a hranpa a thenfai a ngai miah lo ang. Kan bawlh­hlawh paih dan hi ngaihtuah chiang deuh chu a ngai a ni.