Mizote hi kan hriat angin kan pi leh pute kha kuthnathawka eizawng an ni a, buh kha chaw bera an neih avangin an ngai pawimawh a. Chhung tinin buh kham neih an tum a, thlai dangte erawh a kalpui deuh chauh an ni. Hun rei tak chhung buh chu chin berah an hmang a, thlai dang chu hralhna tur a awm loh vangin anmahni eikhawp deuh chauh an ching thin a ni.

Khawvel thang zelah hnam dangte nen nasa takin kan inkalpawh a, kan thlai tharte pawh Mizoram chhunga deh ral mai bakah ram dangah hralhna a awm ve ta zel a. Hei hian kuthnathawktute a ti phurin thlai chin kawngah tanlakna thar a siam a, kan thlai chin zingah pawh sawhthing hi a hlawkin hralh a awlsam mai bakah enkawl a awlsam deuh a ni mai thei e, kuthnathawkten chin uar berah an nei ta a tih theih awm e.

Kum tinin Mizoram sawhthing tharchhuahte chu hnam dang ten leiin khawvel hmun dangah an thawnchhuak leh chhawng thin a. Sawhthing hmun nei tha deuhte phei chuan kum tin nuai engemaw zat an lei chhuak thin a ni. Mizoramah kuthnathawktute ngaihsak sawrkar nia mipui ten an hriat ZPM sawrkar a lo din atang leh anmahni sawrkarna chelhtute pawhin a hmaa an lo tlangaupui tawh angin 'Kg. ah Rs. 50 in sawhthing kan lei dawn' an tih avangin kum dang aia uar leh zualin kuthnathawktute pawhin an ching a ni.

Mahse thil hi a sawi mai mai theih a, chutih laiin a taka tih chiah hian harsatna engemaw zat hi a awm thin. Chutiang chiah chu tun sawrkar pawh hian an hmachhawn niin a lang a, thlai thar lei tur pawh zirchianna nei sa vek (research base) a kal tura insawi kha tunah chuan harsatna an tawk ta a ni. Tarlan tawh angin kuthnathawktute hian tum dang zawng aiin tun sawrkarah hian beisei an nei sang a. An sawhthing thar hi sawrkar hian a intiamna angin kg. ah Rs. 50 hian la thei ngat se chuan an hlawkpui hle ang. Mahse mipui ten sawrkarah beiseina sang tak an neih laiin sawrkar lam chuan an lei mumal thei ta lo a. Sawhthing hi chawh hnua rei tak dah anih chuan a rihna tam tak a hloh thei a, chubakah a chawr mai thin.

Mizoram sawrkar chuan naktuk atangin sawhthing hi lei tan leh a tum a, a tum anga thil a ti thei anih chuan kuthna­thawk­tute tan chuan hriat a nuam hle ang. Sawhthing lei chung­changah hian hmun thenkhatah induhsakna bik a awm niin an sawi a, hei hi thil dik anih chuan mipui sawrkar tana thil mawi lo tak a ni ang. Engpawhnise sawhthing hralh thuai thuai hi kuthnathawktute hian an nghakhlel tak zet a, sawrkar hian theihtawp han chhuah teh se.