DOWNLOAD OUR APP

Read latest news on your phone
app-store

EDitorial : Sawrkar hnathawk lungawi lo

Jul 10, 2022

Sawrkar hian lungawi lo mek te thil beisei hi ngun takin zirchiang sela, an harsatna te hre chungin nakin zel atan inbuatsaih nan hmang teh se

Tunhnaiah Mizoram sawrkar hnathawk lungawi lohna hrang hrang hriattur a awm ta zeuh zeuh a. Heng lungawi lohna te hi hlawh leh a kaihhnawih sum chungchang an ni deuh zel a. pawh pahnih phei chuan naktuk atangin a huhoa lungawi loh lantirnan chawlh runpui 'mass casual leave' lak an rel hial a ni.

Mizoram sawrkar hnathawk inzawmkhawm pawl Federation of Mizoram Government Employees & Workers (FMGE&W) chuan central a hnathawkte DA a tihpun anga ti pung a, tuna DA an lak mek 28% chu 34% a tipung turin sawrkar an ngen a. Mahse sawrkar lamin sum a awm loh thu leh lungawi lohna lantir lo tura an ngenna chu zawmin hmalakna an chawlhsan hrih a ni.

Hetih lai hian pawl pahnih NHM Employees Union Mizoram (NEUM) te leh Federation of Mizoram Samagra Employee (FEMSE) te chuan naktuk atangin chawlh lak an tum a ni. Heng pawl pahnih te lungawi lohna hi anmahni thlirna lam atang chuan a awm hle ang tih a lang a. Mahse mipui ten engtin nge an ngaih ve ang tih erawh hriat a chakawm hle.

Kan hriat angin Mizoram chu state indodelh lo leh chawmhlawm state kan ni a, keimahni kutkawiha sum thawhchhuah kan nei tlem hle. Chuvangin sawrkar hnathawk te hi han duhsak deuh dawn pawh nise state sum atang chuan a harsa hle ang tih a hriat theih a ni.

Hun kal tawh han chhuilet hian inthlan dawn apiang hian sawrkar hnathawk hlawh leh hamthatna phut hi an pung niin a lang a. Chutiang zelin khua leh pawl hrang hrang te pawhin an thilphut te auchhuahpui nan leh sawrkar nawr nan an hmang thin niin a lang. Hetianga thil nawr chin hi thil tha lo taka, a hnua inchhirna thlentu a ni duh chawk a ni.

Tun tumah pawh sawrkar hian ngun leh uluk taka ngaihtuahna a sen a tul a. Tuna sawrkar hnathawk lungawi lo mek te thilphut hi tih hlawhtlin chi a ni em, lo ti hlawhtling ta se engnge nghawng a neih dawn tih te ngun tak a ngaihtuah hmasak a pawimawh a. An thil beiseite zirchiang lova inthlan hnaih vanga tih hlawhtlin lo tiam leh ngawt te thil awm thei a ni. Chuvangin sawrkar hian lungawi lo mek te thil beisei hi ngun takin zirchiang sela, an harsatna te hre chungin nakin zel atan inbuatsaih nan hmang teh se. 

Share now