DOWNLOAD OUR APP

Read latest news on your phone
app-store

EDITORIAL : Sawrkar leiba

Nov 27, 2022

Sum puk leh leiba neih hrim hrim hi mipui hian an duh lo lam ni lovin langtlang taka sum hmanna hriat hi an duh a ni

MNF President leh Chief Minister ni bawk Zoramthanga chuan tunhnaia a thusawina ah Reserve Bank of India in list a tihchhuah thar berah Mizoram chu India hmarchhak state zingah Sikim tih lohah chuan leiba nei tlem ber a nih thu a sawi a. Eptu party thenkhatin 'leiba' ngah lutuk ang leh state dang ai pawha leiba ngah uchuak tak anga mipui an fah thin chu tha a tih loh thu leh thu dik tak mipui hriattir chu tha a tih thu a sawi a. CM ang deuh bawk hian Tourism Minister Robert Romawia Royte pawhin Darlung khua in kum 100 a tlin lawmna hmanpuina ah tun dinhmunah Mizoram thawhchhuah a pun zêl avângin thawhchhuah (GSDP) atanga leiba percentage chu tûn hma aiin a tlem tih a sawi bawk a ni.

Sawrkar leiba chung-changah hian inhnialna leh inpuhtawnna a tam hle a. Eptu lam leh sawrkarna chang mektu te thusawi a inang lo hle. Engpawhnise leiba chungchangah hi chuan eptu lam apiangin sawrkar beihna atan an hmang thin a, hetih lai hian sawrkarna fawng vuantu lam erawh chuan leiba a tam loh thu leh a hlauhawm loh thu an sawi ve zel bawk a, mipui tan chuan thudik tak hriat a har thin hle.

Hetih lai hian sawrkarna chelhtu lam erawh chuan leiba a tam loh thu an sawi ve reng bawk a. Inthlan a hnaih hi chuan hetiang inbeihna hi a nasa zel niin a lang.

Leiba chungchang hi sawi thiam a har a, a sawitu a zirin kan pawm dan pawh a inang lo thei hle ang. Khawvel ram hrang hrang te hian leiba an nei vek mai a, khawvel ram ropui bera ngaih USA te, economy thaa ngaih Japan te pawhin leiba hi chu tam tak an nei ve tho a ni. India ram state hrang hrang, state hausa zawk te pawhin leiba hi chu an nei vek a ni. A pawimawh ber ta zawk chu leiba nei lovin kan awm thei lo a, chutih rual chuan kan sum leh pai te hi engtin nge kan hman tih hi a ni.

Sawrkar fing chuan hmundang atanga an sum puk te hmasawnna hnathawhna atan an hmang a, chung atanga sum lo lut leh te chuan an leiba te an rul thin a ni. Mizoramah hian engtin nge kan sum puk te hi kan hman a, thil tangkaiah kan hmang em tih hi a pawimawh lai ber chu a ni. Tuna sawrkarna chang mek te pawh hian sum harsatna karah hian engtin nge pawisa hi an hman tih mipuite hian an thlir reng a, sum harsat lai hian inrenchemna a kalpui em, pawisa hi engtin nge a hman tih hi mipuite hriat chak a ni.

Tun dinhmunah chuan a hun taka sawrkar hnathawk hlawh kan pek hian kan lawm tawk  mai ni in a lang. Sum harsat leh hnathawk hlawh pawh a hun taka pek theih loh laia tute emaw duhsak te hna hmanhmawh leh tul bik awm si lova contract inpek te a awm nia sawi thin hi a fuh lo a. Sum puk leh leiba neih hrim hrim hi mipui hian an duh lo lam ni lovin langtlang taka sum hmanna hriat hi an duh a ni.

Share now