Kolasib District Drivers & Welfare Joint Action Committee chuan Kolasib District chhunga National Highway chhia siamthat a nih theih nan National Highway chu Zirtawp zing atang khan tiamchin awm lovin an dang a, mahse DC ngenna angin a hnu lawkah an titawp leh a. Kawng chhia siam a nih theih nan hian hma an lo la tawh thin a, kawng siamtute chu August 28-31, 2023 chhunga an hmalakna in hmasawnna an nei lo a nih chuan hna chak zawka a kal theih nan Kolasib District huam chhunga National Highway chu siam that a nih hma loh chuan dan an tum thu anlo puang tawh a, an duh ang hmalakna an hmuh loh avangin kawngpui dang ta niin an in sawi a ni.

Mizoram chak lakna ber kawngpui dan a ngai hi a pawi tak zet a, JAC te hian an tum angin dang ta ngat sela chuan nitin mamawh lakluh kawngah nghawng nasa taka nei thei dawn a ni. He an hmalakna hian kawng siamtute hmalak chak a ngaih thu a hriattir ngei beisei ila.

Mizoram hmun hrang hrangah kawngpui sial hna thawh mek a ni a, heng kawngpui sial hna thawktu leh chei thatute hi hnamdang contractor lian deuh vek an ni bawk a. Heng contractor te hian an thawhchhan mipuite hi an ngai pawimawh tawk lo deuh em ni aw tih mai a awl hle. Mizoram chhim lam Lunglei - Tlabung kawng khawihtu contractor te hnathawh danah mipui an lungawi loh avangin hun engemaw chen kawng dan leh harsatna hrang hrang a thleng a. Khualzin phur lirthei te phei chuan mipui tan him lova an hriat avangin hun engemaw chen phei chu an tlan duh lo a ni. Chutiang zelin Mamit lama lirthei neitute pawhin kawng tihthat phut nan hun engemaw chen lirthei an dang tawh bawk anih kha.

Tunah Kolasib lama lirthei khalhtu intelkhawm te chuan hetiang hian ruahmanna an siam leh ta a. Heti tak maia kan rama hnathawktu ten mipui harsatna tawh an hrethiam lo hi a mak tih loh rual a ni lo. Sawrkar hian contractor te hi a nawr na tawk lo nge a ngam lo tih te, heng contractor leh sawrkar thuneitute inkarah hian engemaw mipui hriat loh thil inthup a awm ta mai em ni tih zawhna pawh mipui ah a awm hial ta mai. Sawrkar hian mipui harsatna hre chungin chak leh zuala hnathawk tura contractor te hi a nawr a tul tak zet zet tawh e.