Kan hriat angin Mizoram chu ruah tui tlak tamna hmun a ni a, May thla atanga September thla thleng hi fur a tih theih hial awm e. Hemi hun chhung hian ruah tui kan dawng tha hle a, a chang chuan hemi hma lam leh hnu lam thleng pawhin ruah a tla tam thei hle. Ruah tui kan dawn tam avang leh tlangram kan nih miau avangin leimin kan tuar nasa hle a, kuminah phei chuan leimin kaih hnawiha nunna chan an tam hle a, a pawi tak zet a ni.

Khuarel chhiatna hi chi hrang hrang a awm a, chung chhiatna thlipui, tuilian, lirnghing, kangmei leh leimin zingah kan ram chuan leimin hi kan buaipui ber a. Tlangram kan nih vangin tuilian hi kan buaipui nep a, thlipui chungchangah pawh vanneih thlak takin kan thenawm ramte ngaihtuah chuan kan tuar nep hle a ni. Lirnghing chungchangah pawh Mizoram chu lirnghing na ber thlen theihna hmun niin mithiam ten sawi mahse vawiin ni thlengin lirnghing na awm lovin Pathian venna kan la dawng zel a. Khuarel chhiatna thleng kan buaipui ber chu leimin hi a ni.

Khuarel chhiatna chi hrang hrang te hi pumpelh theih loh te an awm rualin a then hi chu kan pumpelh thei tih chiang takin a lang a. Lirnghing hi eng tika thleng tur nge tih mithiamte chuan vawiin thlengin an la hre lo a, thlipui leh ruahpui sur turte chu hmuh lawk theih a ni ta a. Hei vang hian heng chhiatna lo thleng thei lakah mi tam tak nunna chhanhim a ni a, chhiatna nasa zawk thleng thei pawh pumpelh a ni ta hi thil lawmawm tak a ni.

Sawi tawh angin Mizoramin chhiatna kan tawh nasat ber chu leimin hi a ni a, kuminah pawh leimin hmun tam takah a awm a. Tunah pawh kawng a chhiain engemaw ruah a tlak hlek chuan kawngpui pawimawh tak tak chu leimin vangin a ping zel ta mai. Aizawl khawpui pawh han thlir ila veng hrang hrangah leimin a tam hle a, a then chu nasa tak a nih laiin nasa vak lo pawh a awm a. Hmun thenkhatah phei chuan leiminna bul hnaia chhungkaw tam tak chu a inah pawh riak ngam lovin hmun dangah an riak chhuak hial a ni.

Aizawl khawpui bika leiminna chhan ber hi thildang ni lovin kan tui chhe paih fimkhur loh kan tuar niin mithiamte chuan an ngai a ni. Mithiamte chuan leimin chhan ber hi a chhung che vang niin an sawi a, hei hi chu ven leh pumpelh theih a ni lo. A dawtah chuan mihringte siam chawp vanga leimin hi a ni a, heimi awm chhan ber chu tui chhe paih fimkhur loh vang a ni. Aizawl-a chhungkaw tam tak, in tha tak tak din te pawh hian tui chhe paihna (drain) hi kan ngai pawimawh lo hle mai a, kan compound a pelh chuan kan duh tawk mai niin a lang.

Kan tui chhe paih hian zawi zawi­in lei a chiah hnip a, hun engemaw chen a chiah hnuah leimin hi a lo insiam ta niin mithiamte chuan an sawi a. An thusawi hi a dik a ni tih nemngheh nan leimin hi a tlangpuiin chirh tawlh an ni deuh zel a ni. Heng zawng zawng hi tui chhe paihna mumal leh tha tak nei ta ila chuan a thlen a rinawm loh hle. Tun ang zela kan kal chuan mangkhawng lianpui kan siam tihna a ni a, nakin lawkah chuan building tha tak tak te hi a tlusawp nei nuai lo ang tih pawh a sawi theih loh a ni. Chhiatna thleng zingah leimin vanga chhiatna tam ber hi mihringte siamchawp a ni a, pumpelh theih anih avangin tui chhe paih kawngah tun aia nasa zawkin fimkhur thei ila a duhawm hle.