Mizoram sawrkar chuan November ni 26-30, 2024 inkar chhung khan Mizoram chanchinbumi 10 leh I&PR official mi 2 te chu Sikkim tlawh turin a zin tir a. Press tour a kalte hian an hlawkpuiin Mizoram tana zir tur engemaw zat an hmu a ni. Sikkim hi India ramah chuan khualzin ten an tlawh tam ber pawl a niin an sum lakluhna pawimawh tak pawh tourism a ni. Sikkim hi nitin state pawn atangin khualzin sang emaw zatin an tlawh a, heng khualzin atang hian hotel, lirthei neitu, sumdawng ten hlawkna engemaw zat an tel bakah an state chhunga mi tam takin hna an hmuh theih phah a ni.

Engvanga khualzin ten tlawh nasa em em nge an ni tih press mite zawhna chu official lam chuan 'state pawn lam miten an tlawh theihnan inphochhuah leh intihlar kawngah tan an la nasa' niin an sawi a. Sikkim state a khualzin miten an tlawh tam tak hi Mizoramah pawh a awm ve tho avangin inphochhuah leh tihlar kawngah tanlak a ngai tih a lantir a. Sikkim a khualzinmite tlawh tura rua­hman hmun tam tak hi kawng lehlama thlir chuan a ho hle a, hetiang hmun aia nuam leh tlawh chakawm tak tak hi Mizoramah pawh engemaw zat a awm a. Aizawl chhehvel maiah pawh Reiek tlang, Aizawl khawpui thli sawngbawlna, Aizawl Theological College, Museum, ZMC leh thildang tam tak a awm a. Hengah te hian tour package siamin sum lakluhna tha tak a ni thei dawn a, mahse rua­hman a awm mumal loh vangin khualzin lokalte pawh hmun tlawh tur mumal kan rua­hman sak thei thin lo. Mahse Sikkim chuan ruahmanna fel tak siamin tlawh chakawma an siam tlat avangin an state chuan sum lakluhna tha takah an hmang a ni. Hei mai bakah mikhual dawnsawn kawngah pawh Mizo mipuiten zir tur kan la ngah hle.

Khualzin hip tam tura pawimawh tak chu zu hi a ni. Mizoram hi zu khapna state a ni a, mahse heti chung hian a duh chuan in tur an hmu reng a. Kan rama mipa thihna thlentu tam ber pawh zu a nih avangin zu chungchangah hian ngaihtuahna thar hman a ngai niin a lang a. Khualzin mi tam tak hi intih eng­thawl duh vanga zinte an nih thin avangin zu mamawh mi engemaw zat an awm thin a, heng mite mamawh phuhrukna tur tual­chhung siam zu thianghlim emaw sap zu emaw awm se chuan tun ai hian khualzin tam zawkin Mizoram an tlawh ngei a rinawm.

Mizoram hian khualzinmite tlawh chak tur hmun mawi leh nalh tak tak a ngah hle a. Heng hmunte hi tun aia tlawh chakawm lehzual tura chei ni ta se chuan kum tin mi sang telin Mizoram hi an tlawh ang a, a hlawkna tel tur chu Mizo mipuite an ni dawn tih hriain Sikkim atang hian engemaw zir chhuak thei ila a duhawm hle.