Central YMA chuan Aizawl khawpui chhunga hnam dang, dan lova iron rod leh cement zuar te bakah Mizo hming hawha sumdawng te chu an dawr an khar tir a. Heng dawr khar tir zinga dawr 74-te chu dan anga kalpui tawh tura an intiam avangin hawn tir leh an ni a, heng dawrte hi dan anga an kalpui zui a nih leh nih loh chu Central YMA leh Branch YMA ten vil zui zel an tum a ni.

Hetianga kan tlawmngai pawl lian ber mai YMA te an chet chhuah a ngai ta mai hi kawng lehlam zawng taka thlir chuan a zia lo hle mai a, mahse an ni an chet chhuah loh chuan che chhuak tur dang an awm loh avang leh an hmalakna a chak avangin an chet chhuah a tul ta a. He an hmalakna hian awmzia a neih ngei a rinawm a ni.

Kan hriat angin kan thenawm state hrang hrang te chu sumdawnna thilah hnamdang ten an chimral vek tawh a. Cachar district khawpui Silchar ah chuan a ram neitu Cachari te ni lovin Bengali ten sumdawnna lian zawng zawng an thuhnuaiah an dah vek tawh a. Tripura state lah nise thuneitu te chu Bengali niin Meghalaya khawpui Shillong ah pawh sumdawnna lian enkawltu chu a ram neitu Khasi te ni lovin hnamdang te vek an ni. Mizoram chiah hi hnamdang ten an la thunun loh chu a ni hial awm e.

Mi tam takin hnamdang sumdawng kan dawr chhan chu an rate a hniam vang leh dawr an nawm vang niin a lang a. Hemi kawngah hian Mizo sumdawng te hian tan an lak thar a pawimawh hle. Sumdawng chuan hlep a nei ngei tur a ni a, chutih rual chuan Mizo rilru ah hian vawi khata hlep tam duhna hi a awm niin a lang a, chumai bakah customer te dawnsawn kawngah tanlak lehzual kan ngai hle.

Central YMA in dan lova sumdawng te chunga hma a lakna hi a lawmawm a, chutih rual erawh chuan hnamdang sumdawng te hi an fin em avang leh Mizo zingah pawh lo thurualpui duh kan awm zel avang hian uluk taka enzui zel a pawimawh a. Tun atanga tan kan lak loh chuan sumdawnna kawngah hian hun reilote ah min chimral mai dawn a, chutih hun chu kan hnam ral hun anih dawn avangin YMA hmalakna hi mipui ten kan thlawp zel a pawimawh.