Tun hnai Dampa Group YMA inkhawmpui hmanpuitu Central YMA President Lalhmachhuana chuan ruihhlo avangin Mizo mipa an thi nasa em em tih sawiin hetiang a nih chuan kan nula ten pasal neih tur an hmu lo mai dawn a, hnamdang pasala an nei ang tih pawh a hlauhawm a, chimralin kan la awm thuai ang tih a hlauhawm a tih a sawi a. Hei bakah hian Aizawl khawpui chhungah hnam dang sumdawng an tam tih sawiin Mizo thahnem takin an hming hawhin hnamdang an sumdawn tir a, Aizawl berah sumdawnnaa min chim ral chuan Mizoram hmun dang pawh chak takin min la chim dawn niin a sawi a ni. Central YMA President thusawi hian ngaihtuah a ti thui a, tan lak kan ngaih zia chiang takin a lantir awm e.

Ruihhlo chungchangah kan hriat angin Mizoram chu ruihhlo siamna hmunpui 'golden triangle' hnaih tea awm kan ni a, chumai ni lovin ruihhlo tawlhna kal kawng a ni bawk. Dan leh thupek kengkawhtu hrang hrang leh tlawmngai pawl ten theihtawp chhuah mahse kan dinhmun chu chiang takin a lang a. Ruihhlo hi kan thihpui nasa hle a, nikum chhung ringawt pawhin ruihhlo hmansual vang hian mi 1885 an thi a. Ruihhlo 'drugs' kan tih mai bakah zu hi Mizo mipa thihna thlentu langsar tak a ni bawk. Khawpui dai maiah zu siamna leh zawrhna hmun a awm a, sawrkar leh tlawmngai pawlte pawhin theihtawpin han bei thin mahse kan thlen chin chu heti hi a ni a, a rem theih lohna chhan chu duh/mamawh an awm tlat vang a ni. Zu tlanchhia kan in lo thei lo a, kan thalai, a bikin mipa kan thi zawih zawih mai anih ta ber.

Tun ang zela Mizo mipa an thi hnem anih chuan kan hmabak hi a thim hle ang. Tun dinhmunah pawh puitling zingah chuan mipa aiin hmeichhia an tam zawk a, mipa hi kan thih belh zel anih chuan nakin lawkah mipa leh hmeichhe inbuk tawk lo lutuk kan hmachhawn dawn a. Kan Mizo hmeichhia ten hnamdang pasalah an nei lo thei dawn lo a, kan tu leh fate-ah hian Ali, Lasker, Majumder tih hi kan la nei nawk lovang tih sawi a har hle. Ruihhlo leh zu hi eng kawngin nge do ila kan sawtpui ber ang, kan do tawhna leh kan hmalak meknaah hian ennawn ngai a awm em? Hlawk zawka kan do theihnan engtia tih hian nge kan hlawkpui ber ang tih beng sika ngaihtuah a ngai ta.

Sumdawnna chungchangah pawh Central YMA President thusawi hi a dik anih chuan hmalak vat a ngai tihna a ni. Kan chhehvel hnam dangte han en ila, a ram mi leh sa lo awm hlun zawkte chu chimral an ni a. Heng a chimraltute hian tharum leh indona hmangin an chimral lo a, an chimralna awlsam tak chu economics hmangin a ni. Mizoramah erawh hetiang em hi a la thleng lo niin a hriat a, hma kan lak vat chuan kan ram hi chhan tlak a la ni tihna a ni. Chutih rual chuan kan ram hi dinhmun hlauhawmah a ding mek a, tun atanga hma kan sawn erawh a ngai niin a lang.