Kristiante hunpui 2024 Krismas leh kumthar 2025 lawmna chu kan lo hmang zo leh ta a, khawi hmun atang mahin buaina leh harsatna lian tham a thleng lo niin a lang a, a lawmawm tak zet. Hetih rual hian sawrkar, tlawmngai pawl leh kohhranten kumthar lawmna atan halpuah leh halmawi hal lo tura min ngenna pawhin zawm a hlawh thaw khat hle a. Chutih rualin ngenna zawm lo mi engemaw zat an la awm a, mahse kan tanrual chuan hei pawh hi a ziaawm chho zel turah beisei ang.

Sawrkar, tlawmngai pawl leh kohhranten kumthar lawmna atan halpuah leh halmawi hal lo tura min ngenna zawm lo hi Aizawl khawpuiah mi 14 man an ni a, hemi kaihhnawihah hian case 33 ziah luh a ni tawh bawk a. Police lam chuan a tul angin an la chhuizui zel dawn a, case ziah luh pawh a pun ngei rin a ni.

Kumthar lawmna kaihhnawiha halmawi leh halpuah hal chungchangah hian ngaihdan inpersan tak chi hnih a awm a, chu chu hal duh pawl leh hal loh duh pawl an ni. Hal duh pawl chuan ramdangah pawh an hal tho a, boruak a tih chhiat phah nasa lutuk lo a ni tiin hunpui lo thleng lawmna atana hal chu a pawi thui lo niin an ngai a. Hetih lai hian hal khap duhtute erawh chuan tul lova sum leh pai senna, boruak tichhetu leh damlote tana harsatna thlentu anih avangin hal loh hi an duh thung.

Engpawhnise mihring hi kan dam that a, chhungkua kan hrisel chuan halpuah leh halmawi hi kan tan harsatna siamtu a ni lo thei a. Chutih rualin kum upa, taksa hrisel lo leh naupang tan chuan thil huphurhawm tak a ni a, mi tam tak chuan hal lohna hmun an pan dawr dawr thin a ni. Halpuah leh halmawi hal vang hian tar chak lo leh hriselna tha lo tam takin an chauh pui a, hemg mite dinhmun hre chunga kan hal loh chhunzawm zel hi a pawimawh hle.

Khua leh tui tha kan nih chuan sawrkar, tlawmngai pawl leh kohhranten kumthar lawmna atan halpuah leh halmawi hal lo tura min ngenna zawm mai hi kan tih tur a ni. Krismas leh kumthar vuak veta ngenna pawisa lote chungah hian sawrkar hian a intiam ang ngeia hma a lak beisei ila. Chutih rualin kum engemaw zat kan lo kalpui tawh kumthar lawmna atana halmawi leh halpuah hal hi chu thawk leh khata rem mai tur chuan beisei chi a ni lo a, tun tuma ngenna erawh mipui ten an zawm that avangin hun kal zel turah pawh beisei a sang hle. Engpawhnise sawrkar hian theihtawpin hma la chhunzawm zel se, kum 2/1 hnuah chuan halmawi leh halpuah hal lohna state kan nih theih ngei i beisei ang u.