Tun hnaiah social media thu vawrhdarh kal zelah ruihhlo ngai enkawlna home pakhat Tawngtai Bethel Camping Centre atangin ruihhlo ngai an enkawl mi thahnem tak chhuah tir an ni a. He home-ah hian insawisakna te, mihring dikna chanvo nasa taka bawhchhiatna a awm niin mi thenkhatin an sawi a. Chuvangin tlawmngaia home dintute hian home atanga chhuak duh chu an chhuah tir ta mai niin a lang.

Kan ramah ruihhlo ti an tha­hnem hle a, chutiang bawkin ruihhlo ngaite enkawlna hmun pawh tha­hnem tak a awm a ni. Ram mipui cheng zat atanga chhut phei chuan khawvela ruihhlo ngai enkawlna hmun ngah pawl tak kan ni hial awm e. Mahse heti chung hian kan home neihte chu a khat em em reng mai a, home in an enkawl theih tawk bak hi mipui leh tlawmngai pawlte ngenna avangin an dawng lo thei lo a. Chu chuan kawng tam takah harsatna a thlen thin a ni.

Tawngtai Bethel Camping Centre pawh hi mi thahnem ngaiin ruihhlo ngaite a enkawlna tura a din niin a lang a, chutiang bawkin Mizoram hmun hrang hranga home te hi thehnemngaihna vanga din an ni deuh vek. Home enkawltu leh neitute hian an enkawl theih tawk enkawl se, ei leh in leh thil dangah pawh hneh deuha enkawl an duh vekin a rinawm. Mahse heti chung hian ruihhlo ngai enkawl tur an tam em avangin loh theih lohin an tlin bak an enkawl a ngai ta thin a ni.

TBCC ah pawh hian ruihhlo ngai 1000 chuangte an awm thin a, an vawi khat chaw ei tur buatsaih sak ringawt pawh hi a hautak hle ang. Chutih lai mekin ruihhlo ti thinte chu ven ngai reng an lo ni a. A vengtu leh home enkawltute lah thiamna bik nei lem lo, thahnem ngaihna vanga inpe te an ni a. Khaw­tlang, YMA, Police leh tlawmngai pawlte chenin indahluh nan kan hmang lo thei si lo. Chutih laia thil thleng palh a lo awm nia sawi hi a dik anih chuan a pawi tak zet a, chutih rualin heti zat enkawl reng mai an nih avang hian tihsual palh erawh thil awm thei tak a ni.

Ruihhlo hian kan ram hi min chiah hneh tak zet tawh a, home heti zat awm chung leh an enkawl theih bak an enkawl chung hian veng/khaw tin maiah ruihhlo ngai hmuh tur an awm tam hle a. Kohhran leh tlawm­ngai pawl ten an puala camping an buatsaihah mi thahnem tak lut tur an awm zel a, kan hnung lawka Synod Revival in ruihhlo ngaite puala camping a siamah pawh mi 200/300 vel lut tura beisei an nih laiin mi 1000 dawn an lut a ni. TBCC-ah insawisakna leh inthlahdahna avanga thil duhawm lo a thleng nia sawi chungchang hi chhui anih dawn thu SWD Minister in a sawi hi a lawmawm a, thil awmdan dik tak hmu chhuakin hei hian tun hnu zelah rah tha a chhuah ngei beisei ang.