Mizoram chuan thla thar maiah MLA inthlanpui kan hmachhawn dawn a. Political party hrang hrang te pawhin theihtawp an chhuahin kar 2 emaw chauh hun la awmah hian tlin ngei tumin an thiam ang angin hma an la mek a ni. Hetih karah hian mawi lo taka chetna hriat tur a la awm lo a, hei hi political party leh Mizoram People Forum ten thawhhona thuthlung an ziah ngaih pawimawh vang a ni a. A lawmawmin thawhhona thuthlung hi zawm zel nise a duhawm hle.

Kumin MLA inthlanpui neih turah hian political party leh sawrkar lam pawh beisei aia inthlan hun tur ruat hma anih avangin mak kan ti tlang niin a lang a. Inthlan puan hun tur awm ang chu kan rin hriat deuh ruak a, hetih lai hian November thla tawp lam emaw December thla tir pawh inthlan ni atan ruat anih kan beisei laiin Election Commission of India chuan November ni 7,2023 a rawn ruat ta si a. Political party te a barakhaih deuh niin a lang.

Political party leh MPF thawhhona thuthlung ah chuan inthlan puan atangin in tina luta mite khawngaihna dil tih loh nise tih a ni a. Inthlan puan hun leh inthlan ni a inhnaih em avangin candidate la tifel lo tan leh puang har deuh tan phei chuan harsatna awm thei a ni a. Kum dang inthlang ang chu ni ila candidate tan pawh hun thawl a awm dawn a, mahse kuminah erawh a bichilh deuh avangin MPF demna thu chakchhuah te pawh a awm hial a ni. House to house campaign leh thawhhona dang te hi MPF in a duh dana siam a ni lo a, political party te nen an siam a ni tih hriat a pawimawh hle.

Mizoram hian vawiin thlengin inthlanna muanawm tak kan la nei thei a, hei hi a chhan chu Kohhran leh tlawmngai pawl chak tak kan nei a. Chung mite thu chu mipui ten kan la awih vang a ni. Kan hriat angin India ram hmun thenkhatah chuan vote thlaktute tharum hmanga vauna te, intihbuaina chi hrang hrang te thlengin nunna chan hial te an awm a, booth capturing tih hial te pawh a thleng a ni. MPF hian inthlanna muanawm kan neih theihna atan hian hma la ta lo se chuan heng chindan tha lo tak tak hi kan ramah a thleng ve lo ang tih sawi theih a ni lo. Chuvangin inthlanna muanawm leh felfai a awm theihna atana MPF hmalakna hi political party leh mipuite hian kan himna tur a ni tih hriaa kan zawm zel hi kan tih ngei tur a ni tih hre thar teh ang u.