Zirtawpni kalta khan Deputy Chief Minister Tawnluia chuan Sialhawk khua in an thar chhuah lakhuihthei (pineapple) kg 230 chu Dubai, United Arab Emirates (UAE) a hralh turin a vai liam a. Dy. CM hian a bial chhunga kuthnathawktute hnenah hralh chhuah tham an thar chhuah phawt chuan a hralhna tur an hmuh ngei ngei nan theihtawp a chhuah ang tiin chona a lo siam tawh a. A thutiam ang ngeiin hetiang hian hma a laksak ta a, kuthnathawktute pawh an phur phah sawt ngei ang.

Mizoram hian sik leh sa nuam tak, ruahtui pawh dawng tha tak kan neih avang hian kan ramah hian thlai chi hrang hrang hi a tha duh em em a. Khawchhak lamah chhungkaw engemaw zatin grape an ching a, a hralhna a awm that phawt chuan an hlawkpui hle a ni. Khawthlang leh hmar lamah pawh kuhva an hlawkpui hle a, chutiang zelin Mizorama thlai chingtute hian a hralhna a awm phawt chuan an hlawkpui hle zel a ni.

Mahse tuna kan harsatna ber nia lang ta chu a hralhna chungchangah hian a ni. Mizote hi hlawk leh tha nia kan hriat ah chuan kan taima hle zel a, mahse kan thlai thar te kan hralh thei loh erawh chuan min ti hnual thung thin. Sawhthing te pawh kan han ching a, kan thar tha em em mai a. Chutih lai erawh chuan a hralhna a awm mumal lo a, hnamdang ten a rate duh ang angin an chhiar mai thin a, hei hian kan phurhna hi a tireh thin niin a lang.

Chutih rual chuan Mizo ten tam kan tih hi a la tam tawk lo hle a. Company leh sumdawng lian ten an buaipui tham tak tak hi a la tling thin lo a, hei tak hi a buaithlak lai niin a lang. Sawhthing a ni emaw lakhuihthei a ni emaw dragon fruit pawh nise buaipui tham tak tak hi nei ila chuan sumdawng lian te hi an lo lut mai in a rinawm. Oil palm te pawh kan ngah viau in kan sawi thin a, mahse company ten khawl an bun meuh chuan an duh khawp leitur an hmu leh si lo a. An tan hmalak a har phah thin a ni.

Ram dangah chuan sumdawng lian leh company lian tak tak te awmin heng te hian thlai thar lei leh hralh hi an buaipui thin a, Mizoramah erawh chuan an awm ve loh avangin a buaithlak hle. Engpawhnise tun dinhmunah chuan kan thlai thar hralh chungchangah hian sawrkar hi kan innghahna a ni lo thei lo a, chuvangin theihtawpa kuthnathawktute tan tan a lak a ngai a ni e.