Chief Minister hova mi pawimawhte tun hnaia thukhawm chuan thlai thar leina tur chu an bithliah fel ta a, tunah chuan kuthnathawktute pawhin rate hre sa in hna an thawk tawh dawn tihna a ni a. Hei hi thil lawmawm tak a ni. Tun hma deuh te kha chuan rate mumal a awm lo a, Mizorama thlai chin tam ber nia hriat sawhthing pawh kum tin a rate a danglam emaw tih mai tur a ni a. Hetia rate mumal tak a awm takah chuan kuthnathawktute pawh an thaw huai in a rinawm a ni.

Mizorama cheng zinga a tam ber hi kuthnathawka ei zawng kan ni a, kan innghahna leh kan chaw rinpui ber chu buh anih miau avangin lo neih hi hlawk lo mahse vawiin thlengin kan bansan thei lo a. Sum chang thlai pawh han ching ve thin mah ila a hralhna a awm mumal thin loh avangin eikhawp deuh chauh kan ching thin a ni. Tun hnai deuh atang khan kan thlai thar thenkhat chu hnam dang ten an lei chho tan ta a, heng zingah hian sawhthing, hmunphiah, aieng leh hmarcha hi a lar zual an ni awm e.

Kan thlai thar hralh theih an ni ta hi a lawmawm tak zet a, kuthnathawk tam takin cheng tam tak tak an lakluh phah a. Mahse kan buaina thin chu a rate mumal lo lai tak hi a ni. Entirnan Mizoram kuthnathawk-tute chin lar em em mai sawhthing hian rate mumal tak nei ta se la chuan chumi hisap chuan a duhin an ching ang a, a duh lo chuan an ching lo mai dawn tihna a ni a. Hun kal tawhah kha chuan a rate kha hnamdang sumdawng ten an duh duhin an control emaw ni tih mai turin a chang leh a sang a, a chang leh a hniam a. Kuthnathawktuten hah taka an thawhchhuah kha an duh zat zatin an lei sak a ni ber e. Rate that kum leh chhiat kum a awm tlat te kha thil fel lo tak a ni. Mizoram khaw chhak lam Hnahlan leh a chheh velah chuan grape chin a ni a, winery ten grape kg khat Rs. 60 in an lei dawn tih chiang taka an hriat avangin a duh chuan an ching a, a duhin an ching lo mai a ni.

Sawrkar hian mipui hnena a intiam tawh ang ngeiin leh a rate a bithliah ang ngei hian thlai thar thlan bik pali ah hian hma a lak ngei beisei ila. Chutih rual chuan a tir lama sawi awm lem lo, mahse a hnua grade A leh B tih ang chi te hi a siam dawn a nih chuan a tir atangin chiang takin sawifiah se a duhawm hle. Sawrkar hian a tih tur hi a hrechiang hle turah ngai ila, mithiam ten ngun taka an zir hnuah thuthlukna an siam anih ang ngeiin a hlawhtlinna hmuh ngei hi mipui pawhin an beisei hle a ni.