Treasury bazar tia hriat lar Mizoram Legislative Assembly ngheng mai a awm chu tunhnai khan a kang a, bungrua a kang chhia a, a bul hnaia awm PAMRA office a kang ral a, DIPR office pawhin kangmei a tuar nual bawk a ni. Bazar-a thute chu a thlang AMC Multi- Complex, Tuikual South-a an thutna tur awmsaah an insawn chuan kum khat chhung an thut man an chawi loh tur thu Aizawl Municipal Corporation chuan a sawi tawh a. Bazar lama thute pawhin AMC-in hmun a siamah insawn an hreh loh thu leh bazar kang ta chu tumahin luah tawh lo se an ti ve bawk.

Tunhma atangin helai bazar hian sawi a hlawh tawh thin a, lungrem a chim vangin mi an thih phah tawh a, tunah pawh hian chim thei mai dinhmunah hmun thenkhat chu a awm mek nia ngaih a ni. Hun kaltaah bomb a puak tawh a, ram rorelna sang ber Assembly House building thenkhat a ti chhe nghe nghe a. Heng bakah hian ruang chhar te pawh a lo ni tawh a ni.

Treasury bazar hi chhunzawm chi niin a lang lo a, a bul lawkah Assembly House a awm a, a himna (security) atanga thlir phei chuan awm tir zel chi a ni chiah lo. Inkalpawhna tura siam kawng a ni zawk a, a sira bazar nghet siam hian khawpui chhung a ti tawp a, ei tur chitin zawrh anih avangin thianghlimna (hygiene) atanga thlir pawhin chhunzawm chi niin a lang lo bawk.

Kum 2016 khan Trea­sury Bazar Association leh AMC lam pawhin inremna lo ziak tawhin bazar chu hmun danga sawn theih a nih huna titawpin sawn tura tih a lo ni tawh a, bazar luahtu lam pawhin harsatna an siam loh tur thu an lo intiam tawh a. An insawn mai loh avangin AMC lam chuan 2023 chhunga chhuak turin a hriattir leh a, 2023 Krismas vuakvet lai chu bazar thute chuan chhuanlamin 2024 a insawn turin AMC Executive Coucil chuan a ti nawn leh a ni.

Municipal Corporation hi Dan pui tlawhchhana thuneihna sang tak nei a ni a, Mizo ze mawi hawihhawmna lantirin AMC pawh hian a thuneihna a hmang hreh thin ni hian a hriat zawk a. AMC Multi Complex-ah hian bazar-a thute awmna tur felfai taka siam peih vek tawh a ni a, kum khat chhung thut man chawi loin luah theih a ni bawk a. AMC hian bazar sawnthlak hi ti tlang ngam ngei sela, Treasury bazar pawh bazar anga hman chhunzawm loh ni se. Bazar lama thute pawhin mumal zawka khawpui inrelbawlna atana hmalakna leh changkanna zel a ni tih hrechungin bazar thar hi lut ngei se a tha ang.