Khua a thal chho leh ta a, Mizoram khaw hrang hrangah tui a harsa tan leh ta hle. Khaw tam takah chuan tuikang nghak an awm leh tan ta a, Aizawl khawpui ah pawh tui a vang chho tan hle a, tui phur motor te an lun chho leh ta.

Mizoram hi tunhma deuh chuan ngaw chhah tha a, hei vang hian tuihna a tam a. Tui chungchangah harsatna liantham kan tawk lem lo. Khaw hrang hrang pawhin tuikhur tha tak tak neiin tui chungchangah harsatna kan tawk lem lo a. Mahse mihring lo pung zel vang te, tlangram loneih kan bansan theih loh vanga kumtin thing leh mau thahnem tak kan kih vang te leh hmasawnna hnathawh kal zel te chuan kan ram tuihna te a ti kangchat ta a ni.

Khawvel pum thlirin mihring kan pung chho tial tial a, ei leh bar zawnna avangin ngaw kan ti chereu a. Hmasawnna hnathawh avangin boruak kan ti bawlhhlawh a, industry leh factory a boruak chhia chuan khawvel a ti lum telh telh bawk a. Khawvel boruak chhia leh lum zel karah a ni telin tui thianghlim mamawhna a sang chho zel bawk a, heti chung hian tuihna erawh a tlem telh telh thung si.

Tui harsatna hian khawvel ram tin hi a tibuai a. India ram chhung kan thlir pawhin lui tui insem dan turah pawh Supreme Court inrawlh hial te a ngai ta a. Mihring pung chho zelah tui mamawhna a san zel bawk si avangin leh tuihna a tlem telh telh bawk si avangin nakin lawkah chuan tui inchuh hian ram leh ram hi an la indo thuai in a rinawm.

Mizoram ngei pawh sawi tawh angin tlangram lo neih kan bansan theih loh avang te, mihring pung zel avang leh hmasawnna hnathawh avangin tuihna siamtu leh khawltu thing leh mau a tlem telh telh a. Hei vang hian tuihna pawh a kum telin a tlem telh telh bawk a. Kum danga lui te tui luan dem demna hmun te chu an char zo ta a, Aizawl khawpui tui lakna ber Tlawng lui pawh kumtin a tlem tial tial niin mithiam te chuan an sawi. Tunah thal a intan chauh a, nakin lawk Thalvaekchar an tih April thla vel phei chu huphurhawm tak a ni.

Tuihna humhalh kawngah hian hun engemaw chen atang khan Mizorama tlawmngai pawl lian ber Young Mizo Association chuan hma an la a. An hmalakna hian rah tha tam tak a chhuah tawh bawk a. Mahse heti chung hian hmalakna tur a la tam hle. Tun dinhmunah chuan mipuite hian tuihna humhalh a tul zia hi kan la hrechiang tawk lo niin a lang a, tuihna pawimawhzia inzirtir uar hi kan la mamawh hle niin a lang.