DOWNLOAD OUR APP

Read latest news on your phone
app-store

EDITORIAL : UC ngai pawimawh ila

Feb 13, 2022

Mizoram sawrkar budget te hi chu a tlem tham em mai a, a bak hi hmasawnna hnathawh nan chuan a bei tham em em a ni. Chuvangin a tam thei ang ber sawrkar laipui atanga sum kan hnuhchhuah a ngai a. Chumi atan chuan matching share tur kan neih a, utilization certificate pawh a hun taka thehlut zel thei tura sawrkarin tan a lak a pawimawh hle.

Zan khat riaka Mizoram rawn tlawhtu Union Minister of State,  Ministry of Rural Development & Steel Faggan Singh Kulaste chuan chanchinbumite nen an inkawmna ah Mizoram in Central a matching share tur a neih loh vang leh utilization certificate (UC) an thehluh theih loh avangin Mizoram sawrkar chuan sum a dawn tur ang a dawng thei lo tih a sawi a. Union Minister hian Mizoram tan kawng siamna tur 2020-2021 ah 84% chu hman lohvin a la awm niin a sawi bawk a.  Hei hi thil nihna tak a nih chuan a pawi hle a ni. 

Chief Minister Zoramthanga chuan sawrkar laipuiah sum a tam thu a sawi thin a, project siam thiam chuan cheng vaibelchhe tam tak hnuhchhuah theih a ni tih a sawi thin hi thu dik tak a ni. Mahse sum haichhuak tur hian project neih that a ngai a, sawrkar laipuiin an rinngam tur leh hmasawnna hnathawhna tur anih chuan sum hi hnuhchhuah tur a tam khawp mai.

Mizoram rawn tlawhtu Union MoS for Rural Development in a sawi hi thudik tak anih chuan a chhan enge tih hmuhchhuah hi sawrkar tum tur a ni. Hripui leng avangin kan buai a, engemaw chen chu sawrkar inrelbawlna leh hnathawh pawh a khaihlak ngei a ni. Mahse tunah chuan hri hian min chamchilh reng mah se, hmalam pana insangmar chunga hmalak a hun ta hle mai.

Mizoram sawrkar budget te hi chu a tlem tham em mai a, sawrkar inrelbawlna neuh neuh ah a kal zo deuh vek a, a bak hi hmasawnna hnathawh nan chuan a bei tham em em a ni. Chuvangin a tam thei ang ber sawrkar laipui atanga sum kan hnuhchhuah a ngai a. Chumi atan chuan matching share tur kan neih a, utilization certificate pawh a hun taka thehlut zel thei tura sawrkarin tan a lak a pawimawh hle.

Share now