Uniform Civil Code hi tunlai India rama sawi hlawh ber a ni hial awm e. He thil hi tunhnaia Prime Minister in hman thuai a duh thu a sawi atanga sawi lar thar leh a ni a. Central a sawrkarna chelh mektu BJP hian hman thuai an duh tih a lang a, chutih rual erawh chuan tun Parliament session ah erawh he bill hi sawiho a ni dawn lo nia hriat a ni.

Uniform Civil Code hian a tum ber chu India ram a hnam leh sakhaw hrang hrang ten inneih dan emaw inthenna leh rokhawmna kawngah te hian dan hrang hrang kan nei a, hetia dan hrang hrang neih hi a buaithlak a. Chuvangin kaldan phung inang tlang kan neih hi a ngai a ni tihna a ni ber.

India ram hi Hindu sakhaw zuitu tamna ram a ni a, India mipui 80% emaw lai hi Hindu sakhaw zuitu an ni. Hindu sakhaw tihdana India ram kalpui leh kaihhruai an tum hi an thlirna atanga thlir chuan tihawm tak pawh a ni a. Chumai bakah hnam leh sakhaw hrang hrang ten tihdan hrang hrang kan ngah lutuk hi a buaithlak a, UCC an sawimawi pawh hi an thlirna atang chuan tihawm tak pawh a ni awm e.

Mahse India ram hi hnam leh sakhaw hrang hrang chenna a ni a, Uniform Civil Code pawh hi India danpui duangtute chuan constitution ah dah mahse India mipui ten an pawm/remtih tlan hma chuan hman loh nise an ti a ni. India mipuite kan la lungrual lohzia lanna chu pawl hrang hrang thuchhuak atang hian a hriat hle awm e.

UCC hi keini hnam leh sakhaw tlem zawk tan pawh hian a him lo thei hle mai a. He dan hi hman anih chuan Mizo ten inneih nikhuaa kan dan hman te, rokhawm leh sakhaw thil tam tak hi tih a rem tawh dawn lo tih a ni. Mi thenkhat ten kan ram himna tur Article 371G an sawi fo pawh hi duh chuan sawrkar laipui hian a thiat thei reng a, chu chu J&K ah khan chiang takin a hriat tawh a ni. Uniform Civil Code dan in hmarchhak bial a huam lovang tia an sawi te pawh hi ngaihthatna chi a ni lo a, hetah him mah ila India ram zau zawka kan Kristian pui te tan chuan a hlauhawm hle dawn tihna a ni. Chuvangin Uniform Civil Code hi tun dinhmunah chuan Mizote tan hman a him lo hle tih a lang a, hman a nih lohna tura kohhran, tlawmngai pawl, sawrkar leh mitin ten kan do zel hi kan tih ngei tur a ni e.