Health Minister Lalrinpuii chuan ni 10.6.2024 khan ZPM Southern Headquarters Lunglei chhung inkhawmah thu sawiin Village Council ten sawrkar an thawhpui that duh loh vangin VC term pawh tawi a nih mai theih thu a sawi a. Kar kalta Inrinni (19.10.2024) khan Home Minister K. Sapdanga pawhin kum thar February thla a Village Council inthlang hman turin inbuatsaihna kalpui mek a ni tih sawiin ZPM chuan Mizoramah sawrkarna chang mahse Village Council tam zawkah party dang VC an la tam zawk avangin hmasawnna hnathawh a harsa niin a sawi a. Minister pahnih thusawi atang khian chiang taka thil lang ta chu tuna VC ding mek term hi pawh tawi a ni ngei dawn tihna a ni.

Tuna Village Council dinglai term hi August 2025 a tawp tur a ni a, sawrkar lai hian a duh chuan an term hi thla 6 in a pawt tawi dawn tihna a ni a. Term pawh tawi hi sawrkar chuan a ti thei ngei mai a, mahse chhuanlam tha tak a awm a nih loh chuan thil thleng zen zen lo a ni. VC leh Local Council term hmasa kha Covid-19 hrileng vanga a hun taka inthlan theih a nih loh avangin sawrkar hmasa (MNF sawrkar) khan thla 5 a pawtsei a, hun danga thal laia inthlang thin kha August 2020 khan inthlan a ni ta chauh a, sawrkarin a pawh tawi chuan an term hi thla 6 in an hmang tling dawn lo tihna a ni.

Kan hriat angin VC te hi democracy grassroot tih an ni thin a, sawrkar laipui pawhin a ngai pawimawh hle a ni. Sawrkarin VC te thiah a tum chhan ber nia sawi 'thawhpui harsa' tih lai tak hi hriatthiam a harsa a. Englai takah nge thawhpui an harsat tih puanzar a nih loh chuan mipui chu an bangbo hlein a rinawm a, kawng lehlam zawnga ngaihtuah chuan tun Ministry hian an sawrkar tirh, party leh sawrkar vung lai takin inthlan hi buatsaih an duh niin a ngaih theih. Sawrkar hian anmahni thawhpui tha duh lo leh thil ti dik lote chu a hrem thei a, tun term chhungah ngei pawh VC engemaw zat chu chawlh/ban tir (dissolve) an ni tawh a ni.

VC term pawh tawi chungchangah hian sawrkar chuan a duh chuan a ti thei na meuh mai, mahse a chhuanlam erawh chhuanlam tling a ni em tih zawhna awm thei a ni. Thla 6 chhung emaw lek hi dan pangngaiin han kal se, a hun taka inthlan ni ta se chuan VC te pawh hi an lung a dam deuhin a rinawm. Engpawhnise VC term hi sawrkarin a pawt tawi anih chuan thil hnutchhiah (precedence) a siam dawn tihna a ni a, nakin zelah sawrkar inthlak lo awm ta se tun ang zel hian an ti lo ang tih sawi theih a nih loh avangin VC term hi a nghet lo hle tihna a ni dawn a ni.