DOWNLOAD OUR APP

Read latest news on your phone
app-store
EDITORIAL : Vote chhiar hun sawn
Nov 19, 2023

Mizoram MLA inthlanpui vote chhiar hun tura Election Commission of India in a ruat December ni 3,2023 chu Pathianni, Kristian te tana ni pawimawh anih avangin sawn turin political party hrang hrang, kohhran intelkhawm leh tlawmngai pawl te chuan an ngen a. A hun sawn chungchangah beiseina sang tak neih anih laiin chuan Election Commission of India erawh chuan sawn a tum lo thung.


Pathianni hi keini kristian te tan chuan ni serh a ni a, chhungkuaa Pathian kan biak ni, hnathawh pawh kan chawlhna ni a ni. Hetiang ni khera thil pawimawh lutuk inthlan vote chhiar ni atan ECI in a ruat mauh mai hi kan thlirna atang chuan thil awm ang lo lutuk a ni. Election Commission of India hi chu constitutional body niin thuneihna hrang daih nei chu a ni ngei mai a, kawng lehlama thlir chuan sawrkar laipui hian kan ni serh hi eng teh vakah min ngaihsak lemlo em ni aw a tih theih a. India hi sakhaw zalenna ram a ni a, inthlang ram kan niin inthlan leh a kaihhnawih hi thil pawimawh berte zinga mi a ni a. Inthlan vote chhiar ni atana kan hun pawimawh Pathianni ruat a ni kher te hi Kristiante thlirna atang chuan a ngeiawm duh hle ang.


Hetiang hi thil awmdan ni mahse thlirna tlang hrang hrang atanga ECI rilru pu chunga kan tarmit kan vuah ve a ngaihna chin a awm a. Kan hriat angin tun tumah hian Mizoram chauh hi inthlang kan ni lova, kan ruala inthlang state dangte inthlan ni hnuhnung ber hi November ni 30,2023 a ni a. Inthlan buaipuitute inchinfelna atana ni 2/1 te mamawh thin a ni a, chumai bakah inthlanna hmanrua te hi rei tak dah chi a ni lo bawk nen ECI thlirna atang chuan December ni 3,2023 hi a ruala chhiarna atana ni remchang hmasa ber niin a lang.


Hei bakah hian vote chhiar hi chu mipui nawlpui telna tur ni lovin ruat bik mi thenkhatte telna tur chauh a ni a. Inthlanni (vote thlak ni) hi Pathianni emaw Inrinni te emaw chu nise mipui nawlpui nghawng, kan zavaia telna anih dawn avangin a remchang lo a, mahse vote chhiar nen chuan a dang deuh. Kum 2013 pawh khan ECI hian inthlanni atan Inrinni a ruat a, mahse Sabbath ni anih avangin a sawn leh ta anih kha. 


Inthlanna hi kum 5 dana neih thin a ni a, tun tumah pawh hian vote chhiar ni atan Pathianni an ruat fuh palh ni maiah ngai ila. Kristiante min pawisaklohna lam ah ngai lo ila, kan duhthusam ni lo mahse Election Commission of India ruahmanna hi pawm thiam tum mai ila a hahdamthlak awm e.

Euro 2024 final opinion poll
Euro 2024-ah hian tunge champion I rin?
Spain
England

Latest News & Chhiar Hlawh