Nikum maiah Mizoram chuan kan state a roreltu tur MLA kan thlang a, vote pawh a tla tha hle. Kan hma lawkah India rama roreltu tur Member of Parliamaent kan thlang leh dawn a. Party hrang hrang ten an candidate te an ruat fel chho zel a, tunkar atang chuan candidate te leh political party te pawhin campaign rusum an thlak tawhin a rinawm.

Inthlan kaihhnawiha India rama thuneitu sang ber Election Commission of India chuan vote thlak hi a ngai pawimawh hle a. Systematic Voters' Education & Electoral Participation (SVEEP) hnuaiah theihtawp chhuahin vote nei thei ten vote an thlak ngei hi ECI duhthusam a ni. Vote thlak hi India khua leh tui kan nihna anga kan chanvo, kan tih ngei ngei tur a ni a, chuvangin kan hma lawka Lok Sabha MP inthlan loawm turah hian vote thlak ngei tura kan in buatsaih a pawimawh hle.

Sawrkar lam pawhin theihtawp an chhuah chho ve reng a, hmun hrang hrangah te campaign neiin mipui hnenah vote thlak pawimawh zia an tlangaupui reng a. An hmalakna hian awmzia pawh a nei a, theihtawpa sawrkar thuneitu lam pawhin tan an lak sauh sauh a pawimawh.   

Kan hriat angin India ram chu inthlang ram kan ni a, harsatna a awm anih loh chuan kum 5 danah kan aiawha roreltu tur kan thlang thin a ni. Kan hma lawka MP inthlan loawm turah pawh kum 5 chhunga kan aiawh tur kan thlang dawn aa, chuvangin mipui ten bengsika ngaihtuahna hmang chunga tunge kan ram tan tha ber ang, tu hian nge ram hmangaih ber ang tih rilru pu chunga ngaihtuahna kan sen a tul hle.

Mi tam tak chuan 'MP te chu kan chhawr tak tak lo, tu pawh tling se a pawi lo, Mizoram in MP 1 chauh kan nei a, awmzia a awm tak tak lo' tih rilru te kan pu thin. Hetiang hi kan ngaihtuahna ah awm lo hram se a tha hle a, mi puitling kan nih tawh chuan chhia leh tha hriatna nei vek kan ni a, he kan hriatna hmang hian kan aiawh tur thlanna ah hian kan vote hi kan thlak ngei tur a ni.

MP thlan turah hian vote tur kan hre ngang lo anih pawhin NOTA a awm a, chuta thlak tur tal chuan inthlanna hmun hi kan pan ngei a pawimawh a ni. Mizoram inthlanah hian MLA ah vote a tla tha tlangpui a, MP ah erawh vote a tla chhe tlat zel a, hei hi thil pawi tak a ni. Chuvangin kan hma lawka MP inthlan loawm turah erawh kum dang aia vote a tlak that ngei theih nan a tam thei ang berin vote i thlak ngei ang u.