India ram hi inthlang ram kan ni a, a khat tawkin kan aiawha roreltu tur kan thlang thin a. Chung kan aiawh kan thlan thin zingah chuan Lok Sabha a kan aiawh tur Member of Parliament, state a roreltu tur Member of Legislative Assembly, Autonomous District Council a roreltu tur Member of District Council, Municipal a roreltu tur Corporator/Councillor leh tual chhunga roreltu tur Village Council/Local Council te hi mipui nghawng zual an ni awm e.

Mizoramah pawh naktip maiah Siaha leh Lawngtlai district huam lovin Mizoram pumah Village Council/Local Council kan thlang dawn a. Party tinte chak tumin candidate nen theihtawp an chhuah mek a, campaign pawhin a vawrtawp a thleng mek a ni. Party leh candidate ten theihtawp an chhuah lai hian khawi atang mahin buaina chhuak a awm hriat a ni lo a, thil lawmawm tak a ni.

Mizoram kan vanneihna em em chu inthlanna felfai leh muanawm tak kan nei thin hi a ni a, hei hi state dangte pawhin neih an chak, mahse an neih hleih theih loh a ni. State dangah chuan inthlan dawn leh inthlanniahte buaina nasa tak chhuakin thi leh hliam pawh an awm nual thin a, hmun thenkhatah phei chuan inrikrapna leh invauna hialte thlengin vote thlak ngam lo an awm hial bakah inthlanna hmanrua inhnehchhuhna pawh a awm hial thin a ni. Mizoramah erawh chuan sawrkar, kohhran leh tlawmngai pawlte hmalakna avangin mipui ten zalen takin vote kan thlak thei thin a. Mipui ten zalen taka kan aiawh tur kan thlang theite hi hmun tam taka an tih ve theih loh anih avangin India rama inthlanna lama thuneitu sang ber Election Commission pawhin min fak a, kan inthlan dan zirchiang turin state dang atangin an lo kal hial a ni.

Naktip maiah pawh kan khawtlanga roreltu tur Village Council/Local Council kan thlang leh dawn a, tun tumah pawh hian muanawm taka kan inthlan leh ngei a beiseiawm hle. Village Council/Local Council hi democracy ramah chuan a bulthut (grassroot level domocracy) tih thin a ni a, an pawimawhna hre tawk lo pawh awm theih a ni. Mi tam tak chuan an pawimawhna hre lovin vote thlak loh mai te kan ching thin a, thil pawi tak a ni. Kan khawtlangin hma a sawn kan duh chuan mi tha, khawtlang hmangaihtu kan thlan thiam a pawimawh tak zet a. Chumi kan tihlanna tha ber chu kan duhna taka vote thlak kha a ni. Tun tumah hian kum 5 chhunga kan khawtlanga roreltu tur kan thlang dawn a ni tih hriain uluk leh chik taka kan khawtlang hmangaihtu kan thlanchhuah ngei hi mipuite mawhphurhna a ni tih hriain vote thlak i ngai pawimawh ang u.