Excise & Narcotics Minister chuan Ningani kalta khan Assembly house-ah 'The Mizoram Liquor (Prohibition) Amendment Bill, 2025' chu a pharh a, mahse hemi ni hian MLA ten zirchianna neih deuh an duh avangin sawiho a ni ta lo a ni. Wine leh beer thlah zalen tur chungchangah hian inhnialna a chhuak nghal a, tha ti tu an awm laiin tha ti lo pawh mi engemaw zat an awm bawk.

Wine leh beer thlah zalen duh lo langsar tak chu kohhran leh MNF party an ni a, an sawrkar hlimin Congress sawrkarin zu zawrh phalna a lo pek tawh pawh an ti tawp nghal a. Hei mai ni lovin Ningani kalta veka MNF office bearers thukhawm chu resolution siamin 'Kohhran leh tlawmngai pawlte duh loh, khawtlang leh chhungkua tam tak ti chhe tu anih avanga, zu khap burna dan kan neih mek chu siam danglam a, zu thlah zalenna hmahruai atan wine leh beer thlah zalen a lo ni tur hi pawi kan ti tak zet a, sawrkarin Excise & Narcotics Dept kaltlanga ualau taka mi thenkhat te lei theih tura Zu dawr a siam tur hi tha kan ti lo,' an ti a ni.

Zu a ni emaw wine leh beer pawh nise khawvel awm chhung hi chuan inhnialna hi a tawp dawn lo niin a lang a. Zu chungchangah hi chuan kan ngaihdan hi engtikah mah a thu hmun dawn lo tih a chiang hle. Wine leh beer chungchangah pawh hian thlah zalen duh leh duh lo hian tan chhan tha tak an nei ve ve a, khawi lam pawh an tanna leh thlirna atang chuan a dik ve ve a tih theih.

Kawng leh lama ngaihtuah chuan Mizoramah zu khap burna dan hman mek a ni chungin a duh leh mamawh chuan awlsam takin rak zu a ni emaw a senchi pawh an hmu zung zung thei a. Kan khawpui daifem maiah zu zawrhna hmun lian tak awmin zu in duh chuan awlsam takin in tur an hmu a. Chutih lai erawh chuan tualchhung siam zu hi 'zu tlanchhia' anih miau avangin a siam dan a thianghlim lo hle a, thalai a bikin mipa an thi zawih zawih mai niin a lang. Tun dinhmunah tak phei chuan mi tam tak hian zu hi dan hnuaia zawrh leh mai an duh zawk hial a ni.

Engpawhnise kan ram kuthnathawktu ten hah taka an thar chhuah thlai te hi engemaw taka siam anih loh chuan a hralhna lamah harsatna a thleng thin a. Mizoram khaw chhak lama grape an chinte pawh wine a siam a nih loh chuan a hralhna leh dahthatnaah harsatna an tawk a ni. Chutiang zelin kan thlai thar kiwi a ni emaw dragon fruit leh thlai dang pawh hi engtin emaw siam anih loh chuan tihralna a vang hle a. Hetia sawrkarin thlah zalen deuh an tum hi kuthnathawk tam tak tan chuan thawk huaina tham a ni ngei ang.

Engpawhnise chief minister berin 'thil tha nia kan hriat ah chuan huaisen takin kan kal dawn' a ti a, chuvangin wine leh beer chungchangah pawh huaisen taka kalin tih hlawhtlin ngei an tum dawn a. Kan ram hian a thatpui zawk dawn nge a chhiatpui dawn tih chu hunin a la hril turah ngai ang.