Hripui avangin kum 2 dawn chu zirna in hawn theih a ni lo a. State engemaw zatah zirna in hi hawn a ni tawh chungin Mizoramah erawh chuan online hmangin class kal a la ni a, zirna in te dan pangngaia hawn hun tur chu rinthu mai lo chuan hriat a ni hrih lo.

Zirtawpni a Mizo Zirlai Pawl General Headquarters huaihawta Aizawl khawpui chhung College zirlai hruaitute nen inhmuhkhawmna neih a ni a. He inhmuhkhawmna a kal te hian college chu dan pangngaia (offline) kal nise an ti a. Sawrkar-ah Offline class kalpui tura ngen nise, sawrkar-a ngenna hi March 4 thleng ngaihchan nise, hemi hnua ngenna a la hlawhtlin loh chuan March ni 8, 2022 hian Vanapa Hall kawtah lungawi lohna lantir ni se an ti a. Hei mai bakah offline class kalpui theih loh a, online-a class kalpui a nih rau rau chuan MZU hnuaia Degree Course hrang hrang exam pawh online veka kalpui ni rawh se, an ti bawk a ni.

Online hmanga class kal hi zirlaite hian an hlawkpui ang nge an chhiatpui zawk ang? Thiamna tak tak an nei ang em tih hi chik taka kan ngaihtuah a hun ta hle mai. Zirlai tam tak chuan online hmanga class kal chhunzawm zel hi an duh ngeiin a rinawm a, a chhan chu an tan a awlsam vang a ni. Zirlai tam tak chuan mu mai mai chung emaw khawlai leng chung te pawhin an phone an on chuan class an kal ang a ni a, thiamna tak tak erawh chu an pawchhuak lovang tih chiang takin a hriat a ni. 

Exam chungchangah pawh online hmanga exam hi zirlaite tan chuan a nuam a. Text bu en chung emaw internet hmangin tha tak takin a chhan theih a, zirlai thiam vak thin lo te pawhin pass mark chu sawi loh full mark deuh thaw te an hmu thei thin a ni. Mahse heng mite hian classroom ah exam hmachhawn ta se enge an dinhmun dik tak ni ang le? Online hmanga exam kan kalpui avang leh khawngaih mark avangin zirlai tam takin pawl an sawn a, mahse thiamnna tak tak erawh an neih a rinawm loh a ni.

Class XII hnuailam hi dan pangngaia class kan kaltir thei lo anih pawhin college chin tal hi chu offline hmanga class kaltir dan zawn ni tawh se a tha hle mai. Dan tlangpuiin college chin hi chu Covid vaccine pawh dose 2 la tawh an ni furin a rinawm a, chumai bakah CAB pawh an hre tura ngaih an ni. India ram state tam takah pawh college hi dan pangngaiin an hawng tawh niin a lang.

Hripui chungchang kan dawnsawn dan hi a tira kan dawnsawn dan leh vawiina kan hmachhawn dan hi a dang ta hle a. Covid hrilen tirh kha chuan hlauh namen lohin kan hlau a, tunah erawh chuan hripui kan hlauh dan pawh a nep a. Hri kai an awm pawhin mipui ten kan dawngsawng thiam ta hle. Chuvangin hri avanga kan tih tur chi hrang hrang te kan ti thei lo ringawt hi a fuh lo hle mai. Zirlaite hian thiamna tak tak nei lovin pawl an sawn zel mai ang tih a hlauhawm a, chuvangin fimkhur tak chunga zirna in hawn leh tawh hi a hun ta hle niin a lang.