School Education Minister Dr. Vanlalthlana chuan tunhnaia chanchinbumite a kawmna ah zirtirtu 161 lak an nih tur thu a sawi a. Zirtirtu lak tur hi written test leh interview hmang lak tur an ni a, an thiam em tih en an ni dawn a. Minister leh ZPM party in list an nei dawn lo tih sawi bawkin fair taka interview kalpui anih theihnan official te viltu tur 3rd party observer pawh an awm tur thu a sawi a ni.

School Education Minister sawi anga zirtirtu hi lak a nih chuan a thiam leh tling ngei te chauh lak an ni dawn tihna a ni a. Thil lawmawm tak a ni a, chutih rual erawh chuan Minister tum ang hian an kalpui thei tak tak ang em tih chu zawhna awm thei a ni.

Zep nak emaw hun kal tawh han thlirkir ila hna lak reng rengah Minister, MLA leh party recomment a lar thin hle a. Sawipuitu leh tihpuitu tha nei ve lo tan chuan hna hmuh chu thil theih loh tluk hial a ni a. Thalai tam tak pawh an beidawng hial a ni. Heng hnalak hrang hranga harsatna siamtu ber chu tu dang ni lovin sawrkarna chelhtu party leh Minister/official chhungkhat laina hnai an ni zel a ni. Tun tum hnalak turah pawh hian party worker te hian an chhungkhat leh party mi leh sa thun an tum mai thei a, mahse huai taka Minister hian a kalpui a fuh ang.

Sawrkar hnathawk tur ah hian pawimawh leh pawimawh lo an awm chuang lo a, an pawimawh avanga sawrkar pawhin hnathawk tura a lak te an ni. Hetih rual hian zirtirtu te phei chu an mihring pui naupangte enkawltu an nih avangin an pawimawh zual a tih theih awm e. Zirtirtute hi 'ram leh hnam chhertu (builders of the nation)' tih an ni hial a. Naupang kaihhruai tura a tling te la lova tute emaw duhsakna avanga tling lo zawk te kan thawhtir anih chuan a tuartu tur chu keimahni bawk hi kan ni.

Sawrkar hnathawk te hian hna an dilin an awmna leh thawhna tur hre saa dil an ni a, mahse hetih lai hian an thawh hnu lawkah tam tak chuan transfer an kherh nghal mai thin. Hei hian sawrkar inrelbawlna kawngah harsatna a thlen thin a, engemaw harsatna bik riau nei te chu awm theih a ni, mahse chutiang ni lemlo ten transfer an beisei reng thin pawh hi tihtawp a hun hle. Sawrkar thar lo piangah hian mipui ten beiseina sang tak an nei a, chu an beiseina kalphung thar chu kan hma lawka zirtirtu lak turah hian enchhinin a awm dawn tih hria in fair takin kalpui ni ngei teh se.