Tun hnai kum 2/1 chhung lekin Mizoram pawna khawsa Zohnathlak ten harsatna hrang hrang an tawk a. Khawchhak lama kan unaute chu sawrkar buai vangin mi thahnem tak Mizoramah an raltlan a, Bangladesh lamah lah nise politics thil vangin mi tam tak an rawn tlan lut bawk a. Chutiang zelin Manipur lamah lah nise chi leh chi inkar buaina avangin mi tam tak an rawn tlan chhe bawk. Kan unaute buaina hian reh lam aiin punpun lam a pan zel em ni tih theih turin boruak inup a la awm reng niin a lang a, thisen leh nunna hlu tak hi a kal leh mai ang tih a hlauhawm hle.

Tun kar chho maiah pawh Manipur lamah chuan Zohnahthlak volunteer thahnem tak thah an ni a, a pawiin a thinurthlak tak zet a ni. Tlawmngai pawl, zirlai pawl leh political party hrang hrang ten he thihna thleng an dem thu hi an sawi hlawm a. Hetih laia sawrkar lam a ngawi reng mai hi eng nge a chhan hriat a ni lo a, sawrkar a ngawi tlat erawh mipui lamin a hrethiam lo deuh niin a lang.

Zohnahthlak unau ten harsatna leh manganna an tawh changin kan rama tlawmngai pawl lian ber Young Mizo Association chuan nu leh pa chan changin buaipui hna a thawk thin a, thil lawmawm tak a ni. Hei mai bakah Mizoram mipuite pawhin kan unaute hi kan lainat a, kan theihna zawn zawnah chuan kan puiin la puih zel pawh kan in huam a ni. Hetih laia min rawn beltu kan unau tam takin thil sual leh thil tha lo tih nana min hmang erawh a thinrim thlak a, ram leilung fate chanvo ang chan ve zel tum an awm pawh hi a dik lo hul hual a ni.

Zohnathlak buaina zingah hian Manipur buaina hian thisen leh nunna a heh ber niin a lang a, an buaina chinfel pawh hi a har berin a rinawm. Chuvangin he buaina hian eng chen nge a awh dawn tih hriatthiam a har hle a, hnam thil anga a kal tawh miau avang hian sawrkar laipui pawh a inrawlh duh lo ni hial te pawhin a lang. Manipur buaina hian Zohnathlakte a huikhawm avangin kan unaute hian tuar thin mahse kawng lehlama thlir chuan Zofate min ti pumkhattu a tih theih awm e.

Zep nak emaw Manipur state chhunga Zohnathlak ten hnam bil rilru an pu nasa lutuk hi thil pawi tak a ni a, an vai hian tangrual pawh nise Meitei hi an la zat chuang lo a. Chutih kara hnam bil anga an kal leh an tangrual lo hian a ti chak lo zual hle a ni. Harsatna an tawh hi zohnathlakte hian inpum­khat­na leh tanrualna siamtu atan hmang thei se a duhawm hle.