Synod Social Front in zirchianna an neihah Mizo mipa thih tamna ber leh thihna chhan ber chu Zu a ni tih an hmu chhuak a, zu khapna rama thihna thlentu tam ber a ni hi thil in hmeh lo tak a ni awm e.

Zu hi hnam tinin kan nei vek a, hnam changkang atanga hnam mawl ber kan tih thlengin mahni siam zu hi kan nei vek a ni. Hei vang hian zu hi hnam tin culture-a a bet tih a chiang hle awm e. Zu in hi thil tha a ni lo a, Kristian te thurin innghahna ber Bible pawhin zu ruih chu a fak lo hle. Mahse heti chung hian Kristian state, zu khapna rama mipa thihna thlentu tam ber chu zu a ni lawi si.

Zep nak emaw Mizorama kan zu in tam ber hi Aizawl khawpui daia siam niin a lang a, heng zu hi 'tlanchhe zu' anih avangin hriselna atam a him tawk lo hle a. Thenkhat sawi dan phei chuan tun hma Mizo pipu ten zan thum emaw zu an up a, a hnua an thlawr leh ang kha ni lovin zan khat thil thua thlawr theih mai te niin an sawi a. Khaw chhak lam atanga damdawi eng emaw hmanga buh pawh tel lova siam nia sawi te pawh a awm bawk. Hetiang hi kan zu in a nih chuan hriselna chuan a tuar lo thei lo ang tih chu mimawl ber tan pawh a chiang a ni.

Zu chungchangah hi chuan inhnialna hi engtikah mah a tawp dawn lova, zu khap duh leh thlah zalen duh pawh khawvel awm chhung chuan kan awm reng dawn. Congress kaihhruai sawrkar khan dan hnuaiah zu zawrh kha a phal a, mi tam tak sawiselna karah huai takin an thutlukna kha an kalpui a ni. Zu zawrh tan tirh kha chuan kan in thiam lovin thihpui pawh kan tam tih kan hre vek a, chutih rualin kum 2/1 hnuah kha chuan zu in pawh kan thiam chho tan niin a lang. MNF sawrkar khan zu zawrh kha a titawp a, mahse zu erawh a van phah lem lo niin zu in thinte chuan an sawi a. Zu quality a chhe reuh mai chauh niin a lang a, zu in thin ten an in chhunzawm zel tho avangin vawiin hi kan thleng ta tiin a sawi theih awm e.

Zu hi thil tha lo, mahse a tel lova mihringte kan awm thei si loh (necessary evil) te pawh a tih theih awm e. Hun kal tawh atangin khawvel history han en ila zu khap hlawhtling hi an la awm lo niin a lang a, a chhan ber pawh mamawh (demand) a awm tlat vang a ni. Heti tak maia zu vanga Mizo mipate an thi nasa hian ngaihtuah a ti thui a, sawrkar leh kohhran pawh hian ngaihtuahna thar an sen a ngai hle tih a lantir awm e.