Aizawl: Lynchpin leh Zalen tangkawpten an buatsaih Edu Fest 2017 chu nimin tlai khan tluang takin zawh a ni a, ni hnih awh Edu Fest hi mi 3000 chuangin an tlawh hman a ni. Edu Fest buatsaihtute chuan zirlaiten an hmang tangkai hle nia an hriat thu sawiin, “Zirlaiten hma an sawn a, an duh leh mamawh te an zawt hreh lo hi hmasawnna lian takah kan ngai a ni,” an ti a. A bikin mipa aiin hmeichhia in an tlawh tam zawk tih an sawi bawk. Tun tum Edu Fest-ah hian India ram hmun hrang hrang atangin zirna in tha eng emaw zat an lo tel a, heng institution te pawh hian an hlawkpui hle niin an sawi bawk. Hetianga zirna in leh zirlaiten inpawh taka inkawmna an neih thin hi a sawt em avangin June ni 1 & 2, 2017 hian Millennium Centre chungzawlah Edu Options buatsaih leh an tum nia thudawn a ni bawk.