School Education Minister Lalchhandama Ralte chuan tunhnaia a bial chhung khaw hrang hrang a fannaah "Education-ah harh tharna a thleng tur a ni,” tih chu an auhla anih thu sawiin harh tharna a thlen theih nan hian sawrkarin hna thawk mek niin a sawi a. Minister hian zirna a ngaih pawimawhzia a sawi-chhuak hi a lawmawm a, rah tha tak a chhuah ngei beisei ang.

Mizoram hi India rama lehkhathiam tamna state kan ni chungin central service a lut kan tlem tial tial a, chumai ni lovin ramdanga hnathawk pawh state dangte ngaihtuah chuan kan tlem hle a ni. Kan state chhungah hna kan hmuh chuan kan lung-awi tawk em em a, khawvel zau zawk daidar tumna kan nei lo ni te pawhin a hriat a, hei hian a entir pakhat chu kan huaisen tawk loh vang leh kan thiam tak tak tawk loh vang niin a ngaih theih.

Minister hian Education a harhtharna thlen tir hi engtiang chiahin nge a tum hriat ni chiah lo mah se, tunhnaia Council of Ministers thukhawmin zirtirtu transfer & posting rules a pawm te kha a bultanna chi khat ah ngai ila, huaisen taka bawhzui erawh a ngai dawn a ni. Mi thil chikmi te chuan Education department ah hian zirtirtu hi an indaih tawk niin an sawi a, tuna harsatna ber chu semrual a ni lo hi a ni. Hetianga thutlukna a awm chuan zirtirtu pawh semrual theih a ni ang a, Education a harhtharna hmahruai te pawh a ni thei ang chu.

Education in a tum chu mihring puitling leh hnathawk theia chherchhuah a ni a, chumi atan chuan zirna in (school) din a ngai a. Tun dinhmunah chuan zirtirtu hlawh tha zawk, school pawh nei changtlung zawk leh training pawh nei tha zawk sawrkar school aia private school te naupang luhna atan kan thlang tlat mai hi enge a chhan? A damdawi a awm em tih ngaih-tuah a, a damdawi chu a kha ta deuh anih pawhin kan ei a ngai niin a lang. Sawrkar school te hi luhna tlak lo ah kan siam mai dawn niin a lang a, nu leh pate rinngama kan siam chuan harhtharna a thleng leh dawn tihna a ni.

Mizoram Education a harhtharna thlen tir tur hian tih tur hrang hrang a awm a, eng hi nge kan ramin a mamawh hmasak tih uluk taka sawrkarin a ngaihtuah a tul ta hle. Kan ram tana tha turah chuan huaisen taka kal a tul a, kan Minister hmalak tumna hi a fakawm a, chutih rual chuan tawngka mai ni lo a taka hmuh ngei mipuite hian an beisei dawn a ni.