ZALEN July 14, 2026: School Education Minister Dr Vanlalthlana leh Sport Minister Lalnghinglova Hmar, Aizawl West II bialtu chuan vawiin khan Govt. Dawrpui Vengthar Middle School an tlawh a, he school tun aia ṭangkai zawk leh ṭha zawka hman a nih theih nan ‘Sport School’ a siam theih dan tur a hmunah an enfiah.

Sport Minister chuan Dawrpui Vengthar YMA leh Local Council hruaitute nen inhmuhkhawmin Middle School tih hmasawn dan tur an lo sawiho tawh thu a sawi a. Govt. Dawrpui Vengthar Middle School chu zirlai an neih tlem avangin a building area chu sport nena kaikawpin ‘Sport School’ atan siam ni se, tiin ngaihtuahna an lo hmang tawh a. Sport discipline thlan bikah inkhel thiamten an zirlai bahlah lo a, infiamnaa hma an sawn theih nan Sport School chu siam tum a nih thu leh zirtirtu awm sa leh sport discipline a zirtirtu thiam ber ber ten zirlaite an zirtir tur thu a sawi a. Sport School chu National Education Policy (NEP) 2020 thiltum nena kal kawp tlat a nih thu Minister chuan a sawi bawk.

Dr Vanlalthlana pawhin Dawrpui Vengthar chuan zirna ngai pawimawhtu, bialtu MLA tha tak an nei chu an vanneih thu a sawi a. Khawtlang hruaituten zirna lam an ngaihsak a, an inrawlh tam chuan, sikul leh zirna a tha thin, a ti. Zirna tihhmasawn nan zirtirtu insiamrem leh sem rual mek zel a ni, Education Minister chuan a ti a. Sawrkar Zirna In tihchangtlun hi mi harsa zawkte tanpuina a ni tel a ni, tiin, zirtirtute leh khawtlang hruaitute thawhhopuiah a sawm a ni.

He sawihona hunah hian Sub-Divisional Education Officer (SDEO) Carolyn Rinthanpuii, Govt. Dawrpui Vengthar Middle School zirtirtute leh Dawrpui Vengthar YMA leh Local Council hruaitute an tel a ni.