Tunhnaia NGO Co-Ordination Committee YMA, MUP, MHIP, MZP leh MSU te telna thukhawm chuan Draft National Education Policy, 2019 chungchang an ngaihtuah a. Draft National Education Policy, 2019 hi ram leh hnam tan a him lo niin an ngai a, mipui ten he Bill hi zau zawka an hriat theih nan August ni 9,2019 hian zirchianna neih an rel a ni.

Anni bakah hian Catholic kohhran huaihawtin tun hnai khan kohhran hrang hrang hruaitute, tlawmngai pawl hruaitute, zirlai pawl hruaitute leh zirna lama mithiamte chuan National Education Policy, 2019 duan meka tha lo leh hnam tlem zawkte, sakhaw tenau zawkte tana him lo ni a an hriatte chu sawrkara thlen a, sawrkarin a tul anga sawrkar laipui lama a thlen chhawn leh tura nawr ni se an ti a. He Education Policy thar tur duan meka an duh loh langsar zual zingah Sanskrit leh Hindi uar tura tih a nih laia saptawngin ngaih pawimawh a hlawh lo chu hmarchhak a chengte tan a tha lo an ti a. He Policy thar duan hi kal tlangpui a nih chuan zirlaite chu Hindu sakhaw thurin leh puithuna lamah a hruai thuk thei hle dawn a, ram leh hnam hmangaihna hming pu siin Hindu nunphung leh Hindutva lamah a luh thukpui hle ang tih a hlauhawm niin an sawi bawk. Hei bakah hian hnam leh sakhaw zuitu tlem zawkte tana chanvo leh hamthatna hauh bik lam pawh he policy thar hian a en kan nasa hle niin an sawi bawk a ni.

India ramah BJP kaihhruai sawrkar a lo din atangin Kristian leh hnam tenau zawkte chuan hlauhthawn an nei nghal a, BJP ten an hlauhawm loh thu sawi thin mahse mipuia hlauhna awm chu a reh chuang lem lo. Kum 5 kalta khan Central lamah Prime Minister Narendra Modi kaihhruai BJP leh a sangawi zawnpuite chuan rorelna an chang a, mahse an duh ang MP an neih tam tawk loh vang nge Mizo mipuite hlauh ang em em chuan an awm lo a. BJP term kaltaa lar ta viau mai chu Bawng chungchang a ni a, bawng sa ei leh talh kaihhnawiha nunna chan mi engemaw zat an awm anih kha.

May thlaa Lok Sabha inthlanpui neihah BJP chuan nasa taka hma sawnin MP an ngah ta hle a, party dang puihna tel lo pawhin sawrkarna an siam thei ta hial. Hetah tak hian BJP rilru leh thil tum chu a lang tak tak dawn ta a, Kristiante leh hnam tlem zawk te hlauh a thleng dawn nite pawhin a lang thei awm e. Mi tam tak hmuh danah BJP chu Hindu sakhaw tihdan chawisangtu an ni a, Draft National Education Policy a ni emaw Ayodhya hmuna Ram temple sak leh thil dangte pawh an tharthawh tan dawn niin a lang.

Engpawh nise Education-ah hian state-in thuneihna a nei a, sawrkar laipui chuan eng policy pawh siam se state sawrkarin a zawm loh mai bakah a duh loh thu a sawi ve ngei a pawimawh. Mizorama rorel mek MNF party hi NDA a tel, BJP thawhpui an nih avangin sawrkar laipui ah pawh an thu leh hla in awmzia a nei ngei ang tih a rinawm a. Tlawmngai pawl, Kohhran leh sawrkarin tangruala Draft National Education Policy, 2019 kan duh loh thu kan tihlan phawt chuan awmzia a neih ngei i beisei phawt ang.