September 29, 2023; Special Court (Prevention of Corruption)-in tun hnai a thiam loh a chantir, kum 4 lungina tang tur leh Rs. Nuai 4 chawi tura a hrem, Chakma Autonomous District Council (CADC) Chairman Kali Kumar Tongchangya chu MDC a nihna atanga paih a ni.

CADC Information & Public Relations Department-in thu a chhuahah chuan Kali Kumar Tongchangya hi Nilaini aţang khan member of district council (MDC) a nihna atanga paih (disqualified) a ni a. Chakma Autonomous District Council (Constitution and Conduct of Business etc) Rules, 2002 tlawhchhan a bantir a nih thu an thuchhuah chuan a tarlang.

CADC a Deputy Chairman Sundor Muni Chakma chuan Tongchangya ban a nih thu hi thupek a chhuah a. Chakma Autonomous District Council (Constitution and Conduct of Business etc) Rules, 2002-ah chuan MDC te kum 2 aia tlem lo lungin tang tura court-in hremna a pek reng reng chu MDC an nihna atanga ban tur tih a ni.

Hetih lai hian court-in thiam loh chantir a a hremna chungchangah Tongchangya hi thla thum chhung chu ban a nihna hi tihpuitlin a la ni rih dawn lova, court sang zawka a zualko theih hun chhung hi nghah a ni dawn a ni.

Chumi ti tur chuan amahin court thutlukna thar a awm chuan CADC a hriattir ang.

Kali Kumar Tongchangya hi Special Judge HTC Lalrinchhana chuan Thawhtanni khan NLCPR sum cheng nuai 179 eiruk thubuai-ah thiam loh a chantir a, Thawhlehni khan hremna puangin kum 4 tang tur leh Rs. Nuai 4 chawi turin a ti a, lunginah khung nghal a ni.