ZALEN January 23, 2025: Mizo Hnam Run chhung inkhawm chu vawiin khan neih leh a ni a, e huna thusawitu Rajya Sabha MP K. Vanlalvena chuan Corruption laka fihlim tura intiam ZPM sawrkar hi eiru nasa ber sawrkar niin a sawi. 

K. Vanlavena chuan, "RTI Act hmanga zawhna leh document dil chungchangah Minister dawhkan a thleng thinte leh chhanna mumal a awmlo fo te hian thup duh chin leh zep a awm tih a tarlang chiang hle a, Hei hi eirukna chiang tak a ni. ZPM sawrkar hian RTI hi hnawk a ti em em tih a chiang a. Blanket approval tih ang chi te hi eiruk leh puanhnuai thil a ni. Blanket transparent a awm ngai lo," a ti.

MNF Adviser K. Vena chuan, "Dawt leh thubelhchian dawl lo tak hmangin party dangten MNF hi bei thin mah se, state tam takin an hman duhloh laia, eiruk dona atana seperation of judiciary hmang hmasatu leh RTI Act a taka hmang ngam chu MNF sawrkar a ni a. Hei hian corruption laka MNF a fihlimzia a tarlang a ni," a ti.

Sihphir leh Lengpui airport chhehvel ram hmanhmawh taka lei anih chungchang sawiin Rajya Sabha MP chuan, "India Defence ministry in mimal kut atangin ram a lei lova. Mizoram sawrkar kut atangin IAF-in ram a lei a ni zawk. India ram bungkhata awm kan nih avangin central sawrkar hmalakna hrang hrang; railways, kawngpui sial leh a dangah pawh hmalakna a awm dawnin, state sawrkarin NOC a pek a ngai thin a. Hei hi thil kalphung a ni," a ti.

K. Vena chuan, "Party office hi dawt sawina hmun tur a ni lova, thu belhchian dawllo hmanga mipui rilru hruaisualna hmun tur a ni heklo. ZPM MLA pakhatin, Sihphir leh Lengpui chhehvel ram lei chungchang sawrkarin a hriatpui lova, DC levela tihfel anih thu a sawi kha thudiklo a ni. May 15, 2025-ah sawrkarin heng ram Lengpui leh Sihphir-a mite hi a rukin Award for Acquisition a chhuah vek a, chuvangin ZPM sawrkar hian midang a puh thiang lo," a ti. 

Rajya Sabha MP chuan, "Lok Sabha MP nilai hi Parliament standing committee on Defence ah member anih avangin a hriat ve ngei tur niin a lang a. A hre lo anih chuan a lungawi loh hle a rinawm. Thil dik lo inphum a awm ngei tih leh dan bawhchhiatna a awm tih a chiang a. Thudik hailang turin theihtawp ka chhuah dawn a, a hreturten an hriat ngei theihnan ka aupui dawn a ni. Sawrkar chetchhiatnaah hian kan lawm a nilova, kan kawng Pathianin min ruatsak zel avangin kan lawm a ni," a ti bawk.