November 23, 2022; MAMCO Managing Director hlui Lalremthanga, Lunglei Chanmari chu diklo taka thamna la a puh a nihna ah Special Judge (PC Act) in vawiin November ni 23 khan thiam loh a chantir a, cheng nuai 15 chawi tur leh kum 5 chhung lung in tang turin a hrem.

Court thuremna atanga a lan danin, Lalremthanga hian MAMCO Board of Directors pawmpuina tello in hnamdang pakkhat Mustagar Rahman chu Business Consultant turin a ruat a a, pahnih tangdun in cotractor leh mimal hrang hrang hnenah contract hna pek tiamin, cheng nuai 268 thamna an an la, thamna sum an lak hi MAMCO Board of Directors in a hriatpui lo a, ti turin thuneihna a pe lo.

Lalremthanga hi puh a nihna ah thubuai 3 awrhtir a ni a, thubuai ngaihtuahtu Special Court Judge Dr. HTC Lalrinchhana chuan thubuai 3 ah thiam loh a chantir vek a, thubuai 1 zelah kum 5 chhung lungin tang tur leh cheng nuai 15 chawi turin a hrem a, Lalremthanga hi thiam loh chantir vawi khatna a nih avangin thubuai 3 ah thiam loh chantir nimahse, a tan hun chhung tur chu kum 5 chhung a ni dawn a, a sum chawi zat tur erawh thubuai 3 belhkhawm cheng nuai 15 a ni dawn a, a sum chawi tur hi a pek loh chuan kum 15 dang a tan belh a ngai dawn a ni.

Kum 2012 leh 2014 chho a Lalremthanga MAMCO Managing Director a nih laia thil thleng niin, hetianga thamna an lak hi a tirah hriat a ni mai lo a, Managing Director atanga a chawlh hnuah a aiawh tu tharin thil diklo awm a hmuchhuak a, thil awmdan sawrkarah a thlen a, ACB in zau zawk a a chhui hnuah thamna hi an la ngei tih finfiah a ni.