Aizawl; Aizawl District Court-a Special Judge, (Prevention of Corruption Act) chuan kumin 2022 chhungin ‘eiruk thubuai’-ah mi 17 thiam loh chantir a nei tawh a, chung mite chu jail tang tur leh pawisa chawi tur tea hrem an ni a, a tam zawk chu bail-a chhuah an ni.

Kumina court-in eiruk thubuaia thiam loh a chantirte hi sawrkar hnathawk lai te, sawrkar hna lo thawk tawh thin (pension tawh) leh MLA tanglai te, supplier pakhat bakah, Chakma Autonomous District Council (CADC)-a CEM ni lai leh MDC ni mek pali, MDC hlui pasarih te an ni.

June ni 24, 2022 khan Kau-Tlabung leh Tuipanglui Mini Hydel Project (MHP) siamnaa sum tihchingpen thubuai ah Power & Electricity engineer Laldawngliana chu kum 6 tang turin a hrem a, supplier Swopan Kumar Roy chu kum 3 chhung tang turin a hrem bawk. Jail tan bakah hian an sum tih chingpen zatve, Rs 3,63,000 ve ve chawi tura tih an ni.

Rs. nuai 137 tih chingpen thubuaiah July 25, 2022 khan MLA Dr BD Chakma, CADC CEM ni lai Buddha Lila Chakma, MDC ni mek pali leh MDC hlui pasarihte chu kum khat tang tur leh Rs 10,000 theuh chawi tur a hrem an ni bawk.

November 23, 2022 khan Mizoram Agriculture Marketing Corporation Ltd (MAMCO) managing director nihna hmanga contract leh supply pek tiam a, thamna Rs. nuai 268 latu Lalremthanga, Lunglei Chanmari chu kum nga jail-a tang tur leh Rs. nuai 15 chawi tur a hrem a lo ni tawh bawk.

Hengte bakah hian Kau-Tlabung leh Tuipanglui Mini Hydel Project (MHP) siamna chungchangah December 8, 2022 khan PWD Engineer-in-Chief hlui C.Liansanga chu kum 2 jail tang tur leh cheng nuai 15 chawi turin hrem a ni bawk.