Aizawl June 10, 2024 : Vawiin khan ZPM chuan Party Office-ah chhung inkhawm hun kan hmang a, he huna thusawitu TBC Lalvenchhunga, Adviser to CM chuan, “Eiruk loh ringawt hi thil har a ni lem lo, mahse kan hmuh phak reng eirute kan hrem ngam si loh chuan he sawrkar thar hian tangkaina pakhatmah a nei lo ang," a ti.

TBC Lalvenchhunga chuan, “Dik taka thawh chuan contract hnate hi a hlawk lem lo. Ba thlauva bultan tan, thawh dik tum si tan phei chuan tih chi pawh a ni lo. ZPM-te hi eiru lo turin kan intiam a, eiruk loh ringawt hi thil har a ni lem lo, mahse kan hmuh phak reng eirute kan hrem ngam si loh chuan he sawrkar thar hian tangkaina pakhatmah a nei lo ang. Mipuiten min beisei dan chu eiruk loh piah lamah dik lo taka hausa leh hlemhle te, chung mite hmasawnna hnuaia awm chu an kham avangin an aiawh turin min dah a ni. Dikna kan tih hi a sawia sawi a ni lova, kan huaisen ngam chuan si loh chuan awmzia a nei lo,” a ti.

Sawrkar tha lovin a hrinchhuah zar ZPM-in an zo nia sawiin Adviser to CM TBC Lalvenchhunga chuan, “Sawrkar mumal leh tha takin lokal nise 15th Finance Commission-a kan sum hmuh ve turte kum 2021 khan lo tifel vek chu nise tun ang hian kan buai lovang. Tunah kan sum hmuhna tur kan la thlang chauh a ni a, kum khat chiah hun awm tawhah hian chet lakna hun kan nei hman mang dawn lo a ni. Project pipeline-a awmte delay loh a awm mang lova, kan hmasawnna tur leh mipui chanvo tur tam lutuk min chhuhsak a ni. Chuvangin kan sum dinhmun hi a tha lawk thei dawn lova, a luhaithlak hle a ni."

"Kumina kan sum puk theih chu vaibelchhe 900 a ni a, NABARD atang nen a vaia kan puk theih chu cheng vaibelchhe 1118 vel a ni a, chuta tanga leiba rulh tur kan neihsa chu cheng vaibelchhe 640 zet a ni. Sawrkar inenkawlna tha lo avang khan cheng vaibelchhe 100 zet kan hloh phah a, ka ta emaw tiin a rem rem an phawi hmasak zel avangin vawiin hi kan thleng a, an hnena thleng tur leh pek ngei ngei tur pek theih loh kan la kawl te hi engtin nge ni dawn? Nitin za zelah cheng sarihin a la pung zui a, chutiang chu kan state treasury hi a nih avangin chu dinhmun ata chu kan talchhuah phawt a ngai a ni,”a ti.

TBC-a chuan, “Thil dik lo ti turin mipuite hian kan Minister leh MLA-te hi kan nawr nasa lutuk ang tih ka hlau a. party worker-te pawh kan insum a ngai. Mipui tana ding kan nih angin mipui sawrkar dik tak din kan tum mek a, hei hi rorelna kan kuta a awmchhan pawh a ni. Mi dik lote thawhpuia inhaivur hi kan tih ve tur a ni lova, bul tan turin party mipuiten hma kan hruai a ngai," tiin party mipuite a chah.