Aizawl: Public Health Engineering Department-in a zirchian danin Mizoram mipui zinga 21% te chuan ekin an nei mumal lo tih an hmu chhuak. PHE hotute sawi danin faina kawnga hmalakna chi khat atan ek in nei lote hnenah ek in sakna sum pek chhuah an tum a, tun hma lama BPL chhungkuate hnen chauha pek thin chu kumin atang chuan APL chhungkua te hnenah pawh ek in pakhat sak nan Rs. 12,000 zel pek an tum tih an sawi.PHE thawktute chuan ekin hi a sakna tur ram (compound) nei lo tan pawh mi dang ram neite nen intawmin a sak theih dawn tih an sawi bawk. Mi mal ekin bakah hian vantlang ek in tur pawh pawl leh mi mal anga sa duh tan sak theih a ni dawn tih PHE hotute chuan Zalen palai an hrilh bawk a. Ek in sak nan hian central chuan Rs. 1,20,000, state in Rs. 60,000 leh a thawktu tur (beneficiary) ten Rs. 20,000 an tum ve a ngai dawn niin an sawi bawk a. Vantlang ek in siam turah hian mipa leh hmeichhe inthiarna tur bakah tui hnianghnar tawk a awm ngei a ngai tih an sawi bawk a ni.