November 24, 2023; NGO Coordination Committee aiawh Chief Election Commissioner (CEC) hmuh tum a New Delhi cham mek te'n CEC hmuhna remchang an la nei thei lo.

Election Commission of India-in Mizoram Assembly inthlanpui vote chhiar hun atana a ruat December ni 3, Pathianni chu Kristiante ni pawimawh, Pathian an biakna ni a nih avangin Mizoram Kohhran hruaitute Committee, NGO leh Political Party hrang hrangin vote chhiar hun chu Pathianni leh Inrinni ni lo, hun dang ruat zawk turin ECI chu an ngen a. 

An ngenna chu ECI chuan a tihhlawhtlin loh avangin NGO Coordination Committee chuan, an ngenna bawhzui turin nimin khan New Delhi hi an pan a, vawiin khan Chief Election Commissioner, Rajiv Kumar chu hmuh tum mah se, hun remchang an hmu thei lo a. NGO Coordination Committee Secretary, Central YMA General Secretary ni bawk Prof. Malsawmliana chuan, naktukah lamah hmuh tuma an thawh chhuah leh tur thu leh an hlawhtlin ngei pawh a beisei tih a sawi.