ZALEN August 26, 2025: Congress Thalai chuan thuchhuah an siamah Mizoram-ah MLA By-election vawi engemaw zat neih a lo ni tawh a. Thihna avanga inthlan that a nih tum phei chuan eng party mahin inthlan buaipuitu Election lamin inthlan that tur thuchhuah an neih hmain Candidate an puang ngai lo an ti a, ZPM lamin an candidate tur an puang chu an dem thu an tarlang. 

2021-a Tuirial bialtu ZPM MLA Andrew H. Thangliana a boral tum pawhin Election lamin inthlan that a nih tur thu an puan hmain eng party mahin Candidate an puang lo. Hei hi MLA te zahawmna leh bial mipui tawrhpuina zahawm takah Congress thalai chuan a ngai a ni. 

Congress Thalai chuan Tuirial bialtu Andrew H. Thangliana boral avanga inthlan that a nih dawn khan ZPM leader leh tuna ZPM Chief Minister Lalduhoma hian hetianga bialtu MLA a'n boral hian ralna atan party dang pawhin Candidate pawh an siam ngai loh thu uar takin a sawi a. Tunah Dampa bialtu Lalrintluanga Sailo hi ZPM hian ralna tlingah an ngai lo nge Election atanga inthlan that a nih tur thuchhuah pawh a awm hmaa ZPM Candidate an puang hi an dem a, mihring inzah lohna lian takah an ngaih thu an tarlang. 

MPYCC chuan, "Rintluanga boral sarhû laia ZPM party-in boruak siama programme hrang hrang an buatsaih leh Assembly House-a amah sûnna (Obituary) êm pawh hman anih hmaa Candidate an puang hi Mizoram mipui dem leh mak tih a hlawh hle a. Hetiang inthlan that tur anih thu sawrkar thuneituten an chhuah hmaa Candidate an puang ta mai hi ZPM Party-in pawisak an neih lohzia leh midang an zah lohzia an nemnghetah kan ngai a ni," an ti. 

Dampa bialtu MLA Lalrintluanga Sailo (65) chuan a term hmang zo hman lova July 21, 2025 ah a boral a, Congress Thalai chuan pawi an ti a, amah sunna pawh Congress Party-in a nei a ni.