ZALEN April 12, 2026: Tun hnaiah electric consumer tam takte bill a sang hle a, thla danga an bill aiin a let eng emaw zatin a pung a. Electric bill a pun chhan hi a tlangpuiin smart meter vuah vang niin Power & Electricity department thawktute chuan an sawi.

Electric consumer pakhat chuan tum danga Rs. 1,000 vel chawi thin kha sing chuang fe a lo kal nia sawiin a chhan a hriat loh thu a sawi a. Pa pakhat pawhin Rs. 400/500 vel an chawi thinnaah bill lo kal hnuhnung berah chuan Rs. 8,000 chuang a lo kal niin ZALEN a hrilh bawk.

Bill sang chungchangah hian ZALEN chuan Power & Electricity department thawktute thil awm dan a zawt fiah a, chhan hrang hrang awm thei zingah smart meter vuah vanga bill hun chhung a rei tak vangin bill hi tun hma lama chawi ai chuan a tam tlangpui niin an sawi.

Power & Electricity department thawktute chuan electric meter reading hi mihring hmanga lak thin niin meter reader-ten reading an lak chu office-ah an thehlut leh a, office-a bill siam hun chhung hi thla khat vel a ni a. Consumer hnena bill a thlen meuh chuan thla a lo liam tawh thin avangin consumer-ten thla khat hnuah chauh bill an hmu thin niin an sawi a. Smart meter-ah chuan reading lak ruala bill siam nghal a ni a, a hma lama thla khat liam ta bill siam thin kha awl awm tawh lovin thla hnih bill kha tum khatah a lo thlen tak avangin bill hi a sang ta niin an sawi a. A hnu zelah erawh chuan a san phah dawn lo tih sawiin êng chhit man chu tihsan a ni lo niin an sawi bawk.

Hei bakah hian meter hlui (tam tak hman mek)-ah chhia a tam a, a thara thlak dawnin sum tam tak sen a ngai dawn a. Hei vang hian tlem tete-in bill thin a ni a, smart meter hman a nih takah chuan bill a sang thei niin an sawi a. Chutihrualin tihsual palh hrim hrim pawh a awm ve tho niin ZALEN an hrilh a. Hetianga tihsual awmte chu an hriat chuan an siam thatsak leh zel niin an sawi bawk.

P&E thawktute chuan Aizawl khawpuiah electric consumer nuai khat vel an awm tih sawiin heng zinga a chanve tling lo deuhah smart meter vuah hna hi zawh a ni tawh tih an sawi a. ‘Electric bill sang’ tia harsatna tawk tam ber 80% vel pawh heta tang hian a ni tih an sawi a. Harsatna tawk zinga 10% vel chu tihsual palh ve hrim hrim a ni tih sawiin electric bill chu hard copy leh soft copy an hmuhah sofy copy chu rin zawk tur a ni tih sawiin hard copy ah tihsual a awm fo niin an sawi bawk.

P&E thawktute chuan electric bill sang chungchanga harsatna tawkte tan mahni awmna hnai ber Power & Electricity department office-ah zawh fiah theih a ni tih an sawi bawk.

Mizoram Consumers’ Union President Thanglura chuan software thar hman a nih avangin reading lak kawngah tihsual palh a awm thei tih sawiin harsatn tawk an awm chuan MCU chuan an pui thei reng tih a sawi a. Deptt. tih dan a lungawi lo chuan Electricity Redressal Forum-ah thehluh theih a ni a, an chin fel dan a lungawi lo chu Ombudsman-ah a kal leh theih tih a sawi bawk.