ZALEN August 28, 2026 : Mizoram Pradesh Congress Committee chuanvawiin khan Political Session an nei a, he hunah thusawitu MPCC Vice-President C. Ngunlianchunga, MLA chuan, 'Congress ah pawl pawl a awm ve lo a, Hruaitu an nei ṭhat thu a sawi.

"Ram hruaina hna hi thusawi thiam avanga thawh chi a ni lo. Mosia pawh thusawi thiam a ni lo, a dang a awk a. Mahse thusawi tur a unau Arona a awm ang khan keini pawh pa ṭha tak, kan hotupa Pu Lal Thanzara hi thusawi thiam a ni lo. Mahse a bulah IAS retired te, politics a tawnhriat nei dang hotute kan nei." Ngunlianchunga chuan a ti. 

"Ram hruaitu ni tur hian a pawimawh ber chu thusawi thiam ni lovin, hnathawk thei tur, thu dik sawi thin leh thutiama rinawm a ni. Chutiang hruaitu chu Congress in kan nei." a ti bawk.

Pathianin Congress hi he ram hruai leh turin mal a sawm dawn a, a dinthar leh dawn tih hi ka ring tlat a ni. He party hi Pathianin he ram tan mal a lo sawm tawh thin, thil tha tam tak a lo titawh thin, chakloh leh fuallaite pawh a tawng thin a. Mahse, Pathianin min kai tho leh ang. Mi tam tak ten Congress chu in beiseiawm 'mahse' a awm thin. Vawiinah hian 'mahse' a bo ta.

ZPM party chu loh theih lohin an inthlan turte pawh inthlang thei lovin an hotu turte VUC in ruat rawh se an ti a. Inrem awm taka lang inrem si lo an nia, thi reng sia nung hmingpu tih ang deuh khan inrem hauh si lovin inrem awm ang takin an kal mek a, hei hian kum 2028 ah nghawng a nei ngei ang.

MNF unau te pawh an fello e, an tha lo e kan ti lo va, an dinhmun erawh kan hria a ni. MLA 10 an nei a, a kang lam ai chuan a hniam lam an pan zel, a chhan chu high-level-ah hnawk a awm tlat niin an hria a. Chuvangin, phurna a awm lo a ni. Mihringah phurna a awm loh chuan taksa a chak tak tak theih loh, a ti.

ZPM leh MNF te hian NDA nih an inchuh mek a, Modi leh Shah te hian tu nge an pawm zawk dawn an hre lo a ni, a ti.

Ngunlianchunga chuan sawrkar felloh leh thatlohna ngawr ngawr sawi tum a ni lo. Tuna sawrkar mek hi Zoram chauh ni lo khawvel puma Zofa ten an hria a ni. Inthlan hma in thil tha zawng zawng min tiam a, mipui ten beiseina sang tak neiin vote an pe a, an sawrkar ta reng a ni.

Electric bill kan tipung lo ang an tia, a thu chuan an tipung lo, mahse billing system ah an 'trick' ta a ni. Smart meter an tia mipui min ngai pawimawh lo khawp mai a, thingtlang bialtu tan phei chuan phurrit a nia. Buhfai man a letin an tipung phawt mai a. Aizawl tan chuan eng a ni lo ang thingtlang kuthnathawka awm te tan chuan phurrit a ni.

"Kum 15 daih kawng kan siam ang an ti a, kum thum an kal dawn ta, kawng siamna hun chu a awm ve tawh a ni. Tuna an siam lohin engtikah nge an siam ang?."

"Kan ti ang an tih, kan ti lo ang an tih sawi tur a tam lutuk, sawisen a ni lo. Restricted Tender kan sawrkar hunah chuan a awm vak in ka ring lo tiin an sawi a. Mahse, vawiinah chuan sawrkar kal tawh zawng zawngah Restricted Tender ti tam ber sawrkar an ni lawi si a, a manganthlak a ni. 

MUHCS te hi universal healthcare a nia mitin huap tur a nia, eng vangin nge MUCHS hian Aizawl khawpuia kan damdawi in tha private hospital te hi empanelled ah an dah duh ve tlat loh, anni aia rate sang daih zawk Delhi, Kolkata a damdawi In te rate sang tak tak empanelled ah an dah lawi si," a ti.

Ngunlianchunga chuan, "Remna chung changa lal lukhum khum tur an awm a nih chuan Pu Lal Thanhawla a ni." a ti a. "Inremna thuthlung kan CM in a sawi dan hi a ṭullo hle in ka hria. India leh MNF inremna emaw, tute inremna pawh lo ni se, rambuai hreawmzia, zoram mangangin a rum a, kohhran, NGO, mipui kan rûm a, khami titawp tura remna awm kha a tawk mai. Kha inremnaah khan mipui, sawrkar pawh kan tel vek a ni."

"Khang zoram mipui tawrhna titawp tura remna a awm theih nana MNF te hnena lal ṭhutthleng CM kiantu chu Pu Lal Thanhawla a ni" tiin "Remna leh muanna avanga lal lukhum khum tur an awm a nih chuan Pu Lal Thanhawla hi a ni" tiin a sawi bawk.