Aizawl June 9, 2024 : Mizoram leh Manipur state-in electric enkawl kawnga thuneitu sang intawm, Joint Electricity Regulatory Commission for Manipur & Mizoram an din chu thenin state pahnih hian a malin an enkawl tawh dawn.

ZALEN-in JERC hotute hnen atanga thu a dawn danin July 23, 2004 khan Mizoram, Manipur leh sawrkar laipui chuan inremna ziakin kum 20 chhung atan thawkho tur leh hemi hnuah chuan state pahnihte inbiakremna anga kalpui nise tiin memorundum of agreement an ziak a. He inremna hi July 23, 2024-ah a tawp dawn tak avangin Manipur sawrkar chuan a mala kal an duh thu an sawi a, power ministry-ah a hranpaa State Electricity Regulatory Commission an dil angin central pawh hian Mizoram sawrkar chu an ngaihdan a zawt a. Mizoram sawrkar pawhin a remtih avangin kum 20 an lo thawhho tawhna chu tawp dawn ta a ni.

State pahnihte awm zel dan tur chungchang zawhna chhangin JERC member Er. Benjamin L.Tlumtea chuan, “State pahnih hi kan inthen dawn chuan a thawktu (post) hi a zatve (50:50)-a insem tur a ni a. Tun dinhmunah regular-a thawk mi 29 an awm mek a, heng zinga 15 hi Mizoramin a chang ang a, a bak 14 hi Manipur-in a chang dawn a. Anni bakah hian PE, driver leh Group D an la awm bawk a ni,” a ti a. Tun dinhmunah JERC hi Goa & UT leh J&K & Ladakh bak nei an awm lo niin a sawi bawk.

State Electricity Regulatory Commission chu thuneihna sang tak nei a ni tih sawi bawkin Er. Tlumtea chuan, “Electric chungchangah chuan court thuneihna, quasi judicial authority a nei a. Power hman man bithliah emaw, pek chhuah leh thil dangahte state-a thuneitu ber a ni a. Mipuiten êng chhit man leh thil dangah sawiselna an neih pawhin thutawp siam theitu a ni,” a ti bawk.

JERC for Manipur & Mizoram inenkawlna senso hi state pahnihte hian zat leh zatin an intumsem thin a. Mizoramin a hranpaa State Electricity Regulatory Commission a neih dawn takah chuan kum khat chhunga a inenkawlna senso tur hi vaibelchhe 8 vel ni tura chhut a ni.