- Chhara Mizoram ah hian hman atangin electric man hi kan chawi tlem thin tlangpui a ni mai thei, to hi kan tisam em em mai a, a pawimawhna te, a tangkainate, a lova awm a hreawmziate, ngaihtuah hian a to tak tak em lo chhut vet teh. Tunlaiah chuan chhung tin deuhthawin (mi hausa leh rethei BPL chhungkua thlengin) mobile telephone kan nei ta sup sup mai. Chhungkhatah puitling member tawh chuan mobile phone kan nei deuh fur hlawm awm e. Thenkhat phei chuan double sim card hmang chi neiin mi pakhat pawhin connection pahnihte an nei hlawm a, chutianga chhut chuan chhungkhatah connection, chhungkaw member zat aia tam a awm thei awm e. A zat chiah chu BSNL, Airtel, Vodafone, Reliance te hi zawt chhuak ta ila chu mobile telephone connection hi Mizoram mihring chanve zat thuak a ni thei. Heng bakah hian thenkhat chuan telephone landline an la nei a, chubakah BSNL broadband te leh private siam broadband hrang hrangte pawh an la nei tho mai. Heng telephone te hi private company ta vek ani a, a man an tih ang angin i he loin kan hmang chu a ni a. Heng inbiakna vel a senso leh electric hman man chhungkuain kan sen ral hi chhut chian chuan electric bill hi a hniam fo zawk mahna. Chutih rual chuan electric tangkaina ngah em em, in chhunga eng min petu, lum leh vawt min siamsak theitu, insuk tiawlsamtu, chawhmeh min vawn thatsakpuitu leh a dang dang, a chunga inbiakna lam chi zawng zawngte pawh a tel loa kan hman theih miah loh electric hi a hman man to kan tih em em si hi thil in chhut chian deuh chu a ngai lo maw. Nge sawrkar department a nih avang hian tlawm zawk emaw, man mang loa chhit emaw hi kan beisei emaw ni zawk. Chuti lo ni se electric department hi corporation-ah lut ta se tlemin a man hi lo to belh pawh nise kan phunchiar lo zawk dawn em niang. Chhung tin hian electric awm loh vak an hman theih loh atana kan senso leh electric man atana kan senso hi khaikhin ila, a lo to zawk nameuh em le? A tul tawh loh hunah pawh electric eng uar hmuh hian a la to lo a ni ang, kan ren lo em mai.