ZALEN September 13, 2025: Electric Veng VDP, Aizawl te chuan kumin chhunga rakzu leh ruihhlo, a zuar te’n an dahna ni-a an sawi aṭanga an lak khawm chu vawiin (13.09.2025) khan an leihbua-in an ti ral.

Electric Veng VDP te hian zu leh ruihhlo, tam tham lem lo, Police emaw, Excise & Narcotics Department emaw te tana buaipui tham loha tlem, a zuar te’n an dahna ni-a an sawi aṭanga an lak khawm te chu an dah khawl zel a. Hun remchang hmasa berah an ti ral ṭhin a. 

Chu’ng te chu rakzu litre 98, heroin gram 121, alprazolam mum 120, pregapalin mum 33 leh tramadol mum 200 a ni a, an leihbua-in an hal ral ta a ni.

Electric Veng VDP te hian an Adviser, Taekwondo Master, VL Sâwma, August 7 - 11, 2025 chhunga Gyeryong, Chungnam South Korea-a 10th MBC Cup International Open Taekwondo Championship-a Silver Medal leh August 17, 2025-a Hong Kong-a International Board Breaking Championship-a Gold Medal la chu chawimawina thuziak an hlan bawk.