Mizoten India ram huapah 'ber' nihna kan hauh ve ta fo mai, Mizo fashion stylist James Lalthanzuala chu Elle India 'Stylist of The Year' atan thlan a ni ve leh ta - India hmarchhak atanga he chawimawina dawng thei hmasa ber a ni nghal bawk. 

Elle India hian India rama fashion industry leh creative field-a thawkte chawimawina hun 'Elle Graduate Award' a buatsaih thin a, kuminah pawh December 16 khan Istituto Marangoni, Mumbai-ah neih a ni. He tah hian Mizo tlangval James Lalthanzuala chu award ngaihhlut ber pakhat 'Stylist of the Year' atan thlan a ni. 

Elle Graduate Award hi India Fashion Award zinga changtlung ber leh huapzau ber a ni mek a, he tiang Award hi Mizoram mai ni lo Northeast huap ang pawha a vawi khat nan Mizo tlang valin a hlawh chhuak hi a ropui hle. 

Tuikual tlangval James Lalthanzuala hi New Delhi-ah awmin India mai bakah khawvel huap magazine lian ber berahte a sulhnu hmuh tur a tam tawh a, tunah hian talent agency Feat Artists in an represent mek a ni.

Kuminah ringawt pawh sulhnu lian tak tak a hnutchhiah nual a, chung zinga chuan - Vogue India Cover,

Harpers Bazaar Cover, Lakme Fashion Week, Jimmy Choo x id Magazine, Raw Mango, Ekaya, Lenskart Campaign, Amazon, Atmos (international magazine) leh a dang dangahte sulhnu tha tak a nei a ni.