Khawvela mi hausa ber nihna hauh mektu, Elon Reeve Musk FRS hi a turu rem rem khawp a. June 28, 1971-a piang mai chauh kha a ni a, entrepreneur leh business magnate turu a ni.

SpaceX dintu, CEO leh Chief Engineer a nih mek bakah hian Tesla, Inc. investor, CEO, leh Product Architect a ni tel a. Hei hi a la ni mai lo va, The Boring Company dintu a ni a, Neuralink leh OpenAI dintu zinga mi a ni bawk.

Company lian tak tak dintu leh neitu a ni bawk a, November, 2021-ah hian Musk-a hi khawvela mi hausa ber a ni a, a hausakna hi US$ tluklehdingawn 250 vel nia chhut a ni.

Musk-a hi Canadian nu leh South African pa inkara piang niin Pretoria, South Africa-a sei lian a ni a. University of Pretoria-ah rei vak lo a kal thleng hman tihin kum 17 a nihin Canada ramah an pem ta a, hetah hian Queen’s University-ah a zir zawm ta a, kum hnih hnuah University of Pennsylvania-ah insawnin bachelor’s degrees chu economics leh physics-ah a zir chhuak a ni.

Kum 1995 khan California-ah a pem a, khawvela zirna in lar leh tha, Stanford University-a zir zawm tuma pem ni mah se a rilru thlakin sumdawnna lam bul a tan ta daih a. Web software company, Zip2 an tih chu a unaupa, Kimbal a nen an din a. An hlawhtling chho viau va, kum 1999 phei kha chuan khawvel company lian, Compaq chuan hmelhriatin bul an tan nan $ maktaduai 307 zetin a pui a ni.

A sumdawnna lamah hian a tluang angreng hle a, hemi kum vek hian Musk-a hian online bank, X.com an tih chu a thian dangte nen an din leh a, hei pawh hi hlawhtling leh hlein kum 2000 khan Confinity nen infinin PayPal tiin an inthlak zui ta a. He company hi kum 2002 khan eBay chuan $ tluklehdingawn 1.5 zetin an lei ta nghe nghe a ni.

A la duhtawk mai lo va, kum 2002 khan Musk-a hian van thengreng lam kalna  hmanraw siamtu, SpaceX a tih chu a din leh a, hetah hian CEO leh CTO nihna tun thlengin a la chelh.

A la duhtawk lo cheuh va, kum 2004 khan electric vehicle manufacturer Tesla Motors, Inc. (tuna Tesla, Inc. ni ta) chu lei chhawngin chairman leh product architect a ni a, kum 2008 atang khan CEO a ni ta a. Kum 2006 khan SolarCity a tih, solar energy services company chu siamin hei hi Tesla hnuaia siam niin Tesla Energy tih an ni zui a. Kum 2015 khan OpenAI an tih chu mi dang nen an din leh a, hei hi hlawkna um lem lova research company niin artificial intelligence lama hmasawnna tur siamna tur lam zir bingtu an ni a. Kum 2016 khan Neuralink a din leh bawk.