Khawvela hausa ber a ni miau a, a duh zawng chu a hlah meuh lo ang tih ring top rawh. Elon Musk hian thawm a nei zui tawh dawn lo emaw tih hnuah Twitter chu $tld 44 zetin a rawn lei ta hem mai - eng nge a chhan ni ta ang le? Kum 51 mi Elon Musk hian Twitter a lei fel hnu hian hnathawktu lawk tak tak ban a nei nghal nual a, chung zingah chuan CEO Parag Agrawal pawh a tel. Indian-American software engineer Agrawal hi nikum khan CEO atan hian ruat a ni a, kum khat chhung CEO hna hi a chelh hman a ni.

Agrawal bakah hian executive mi pahnihte chu ban zingah hian an tel a, hnathawk a ban nghal danah hian kalphung thlak a tum niin a lang. Elon Musk-a'n Twitter a lei tih thuthang a awm hmasak khan, Musk hian inkhuahkhirhna thenkhat chu an thladul dawn tih a lo sawi tawh a ni. Dan an zawm loh avanga an account tihtawp sak lailawkte pawh hlihsak an nih tur thu a sawi a, hei hian ngaihven pawh a hlawh hle a ni.

Twitter account hren sak zingah hian US preisdent hlui Donald Trump pawh kha a tel a, mipui sukthlek a tha lo zawnga hruai kawi thei zawnga thu a post avanghin a account hi tihtawp lai lawk sak a ni. SpaceX CEO Elon Musk hian vanthengrenga inkahkai lam a buaipui nasa hle a, tunah chuan a khawhawi media hmanga khawvel awp a tum chho leh ta niin a ngaih theih. Twitter CEO Parag Agrawal nen pawh hian meeting an nei a, mahse an inbikna hi a kaltluag lo niin a lang a, a lei fel hnuah Agrawal hi a ban zui ta a ni.

Twitter hi khawthlang miten an hmang nasa hle a, milar mai bakah politician ten an hmang tangkai hle. Hei vang hian Twitter a lei ta pawh hian thawm a nei lian a, US politics thlenga nghawng thei a nih avangin boruak thar a rawn nei chho a nih pawhin a mak lo ang. Twitter hi March 21, 2006 khan din a ni a, kum 16 hmel a hmu ve ta. Tunah hian khawvel pumah mi maktaduai 229 velin an hmang mek anga chhut a ni.