Elon Musk chu mihring piang tawh zinga $tld 200 hloh hmasa ber niin media hrang hrang ten an tarlang. Musk hausakna hi November 2021 kha chuan $340 a nia, khawvela hausa ber dinhmun a luah nghe nghe. Mahse nikum chhung khan sum a hloh hnem hle nia tarlan a ni a, Bloomberg Billionaire Index atanga a lan dan chuan $tld 200 hloh kai hmasa ber a ni hem mai. 

Forbes phei chuan a sum hloh zawng zawng hi $tld 660 a kai niin an tarlang a, mi pakhat sum hloh atan chuan tam hem hem tak a ni. Tesla leh SpaceX CEO hausakna hi tun dinhmunah chuan $tld 115 chauh a ni tawh a, a sum tam zawk a chan tihna a ni. Nikum October thla khan Twitter chu $tld 44 zetin a lei a, heta tanga a sum hmuh leh hi $tld 8 vel chauh a la nih avangin hei pawh hi a sum hlohna zinga langsar tak pakhat a ni. Twitter CEO hian internet khawvelah titi a siam nasa hle a, a chenna chho viau rih bawk. 

Hetih lai hian American sumdawng hausa tawntaw hian a company Tesla share thenkhat a hralh thung a, $tld 23 hu zet a hralh nia sawi a ni. Tesla stock price pawh nasa takin a tlahniam a, a tlakhniamna hi 70% lai a tling.

Kum 51 mi Elon Musk hian khawvela hausa ber nihna dinhmun pawh a chan tawh a, United States bikah erawh a ni aia hausa an la awm chuang lo.

Sum hloh hnem dangte
Elon Musk chauh hi sum hloh a ni bik lo - mi hausain an hloh hnem ni berin a lang. Amazon founder Jeff Bezos pawhin kum 2022 chhung khan $tld 80 zet a hloh a, a net worth pawh $tld 106.8 ah a tlahniam duai - a hausakna zet ve dawn chu a chan tihna a ni. Facebook lalpa Mark Zuckerberg pawh sun hloh tam pawl a ni a, $tld 78 zet a hloh nia chhut a ni. A hausakna pawh a tlahniam viau a, $tld 42.7 vel chauh a ni tawh a ni - a sum hloh zat a tam zawk. 

Google co-founder Larry Page pawhin $tld 40 vel zet a hloh a, a hausakna erawh $tld 76.8 lai a la tling thung. Nike Chairman Phil Knight chuan $tld 18.3 a hloh anga chhut a nia a, a hausakna pawh $tld 45.2  chauh a ni tawh. Leonard Lauder pawhin $tld 10 dawn a hloh ve bawk - mi hausa tawntaw ten sum an hloh vak vak chhan hi chiang taka tarlan a ni lo.